ޑރ. ސުހެންދްރޯ ސަސްޓްރޯވިވޯހޯއަކީ، ވެކްސިންގެ ހުރިހައި ޑޯޒެއް ފުރިހަމަކުރި ޑޮކްޓަރެކެވެ. އިންޑޮނޭޝިއާގައި ޑެލްޓާ ވޭރިއެންޓް ފެތުރެން ފެށުމުން، އޭނާ ބޭނުންވީ ރައްޔިތުންގެ ޚިދުމަތުގައި ދެމި ހުންނާށެވެ. އޭނާގެ އަންހެން ދަރިފުޅާއި ދަނބިދަރިފުޅަކީވެސް، ޑޮކްޓަރުންނެވެ. އެމީހުން އޭނާއަށް އިރުޝާދު ދިނީ އަރާމް ކުރުމަށެވެ. ސުހެންދްރޯއަކީ އުމުރުން 74 ގެ އިސް ރައްވެއްސެކެވެ. ޑެލްޓާ ވޭރިއެންޓް އޭގެ ސިފަ ބަދަލު ކުރަމުން ދިޔައީ ހީވެސް ނުކުރާ ގޮތަކަށެވެ.
ޑރ. ސުހެންދްރޯ، ޖޫން މަހުގެ 18 ވަނަ ދުވަހު ވަކިވެގެން ދިޔައީ، ކޮވިޑް19 އަށް ޕޮޒިޓިވްވެގެން ފަރުވާ ދެމުން ދަނިކޮށެވެ. ޖާވާ ޖަޒީރާގެ ކުޑުސް ޓައުންގައި އިސް ސަފުގައި ހަރަކާތްތެރިވާ އެހެން ޑޮކްޓަރުން ނެކޭ އެއްފަދައިން އޭނާވެސް ވެކްސިންގެ ދެ ޑޯޒް ޖެއްސެވެ. ޗައިނާއިން އުފައްދާފައިވާ ސައިނޯވެކް ބައޯޓެކް ވެކްސިންއެވެ.
ޑރ. ސުހެންދްރޯގެ ދަރިފުޅުވެސް ވަނީ ހަސްފަތާލުގައި އެނދުމަތިކޮށްފައެވެ. އޭނާވެސް ވަނީ ސައިނޯވެކް ބައޯޓެކްގެ ދެ ޑޯޒް ފުރިހަމަ ކޮށްފައެވެ. ކޮވިޑް19އަށް ޕޮޒިޓިވް ވެގެންނެވެ. އިންޑޮނޭޝިއާ، ދުނިޔޭގެ ހަތަރު ވަނައަށް އެންމެ ބައިބޯ ގައުމުގައި ކޮވިޑް19 ދަނީ ބާރާށް ފެތުރެމުންނެވެ. ހަސްފަތާލުތަކުން އޮކްސިޖަން ދަނީ ހުސްވަމުންނެވެ.
އިންޑޮނޭޝިއާގައި ކޮވިޑް ފެތުރެން ފެށިފަހުން 401 ޑޮކްޓަރެއްގެ ފުރާނަ ވަނީ ގެއްލިފައެވެ. އިންޑޮނޭޝިއާގެ މެޑިކަލް އެސޯސިއޭޝަން އިން ބުނާ ގޮތުން މިއިން 20 ޑޮކްޓަރުންނަކީ ވެކްސިންގެ ހުރިހައި ޑޯޒެއް ފުރިހަމަ ކޮށްފައިވާ ޑޮކްޓަރުންނެވެ. މިމީހުން ވަނީ ސައިނޯވެކް ވެކްސިންގެ ދެ ޑޯޒް ޖަހާފައެވެ. މީގެ އިތުރުން ފެބްރުއަރީން ޖޫން 24ގެ ނިޔަލަށް މަރުވެފައިވާ 31 ޑޮކްޓަރުން ވެކްސިން ޖެހިތޯ ކަށަވަރު ކުރުމަށް މެޑިކަލް އެސޯސިއޭޝަނުން ދަނީ ތަހްގީގެއް ހިންގަމުންނެވެ.
ޑރ. ސުހެންދްރޯ މަސައްކަތް ކުރި ކުޑުސް ޓައުންގައި ސިއްޙީ ފަރުވާގެ 358 މުވައްޒަފުން ތިބީ ވެކްސިންގެ ދެ ޑޯޒް ފުރިހަމަ ކޮށްގެންނެވެ. އެކަމަކުވެސް، ދެ ހަފްތާއެއްހައި ދުވަސް ތެރޭގައި މި މީހުން ކޮވިޑް19އަށް ޕޮޒިޓިވް ވެފައި ވާކަމަށް އިންޑޮނޭޝިއާގެ މެޑިކަލް އެސޯސިއޭޝަނުން ބުނެއެވެ.
އިންޑޮނޭޝިއާގެ އާބާދީގެ 5 އިންސައްތައަށް ވެކްސިން ވަނީ ދީފައެވެ. ވެކްސިން ޖެހި ގިނަ މީހުންނަށް ދީފައި ވަނީ ސައިނޯވެކް ވެކްސިންއެވެ.
އިންޑޮނޭޝިއާގެ ސިއްޙީ ދާއިރާގެ ފަރާތްތަކަށް ސައިނޯވެކް ވެކްސިން ދީގެން ކުރިން ކޮށްފައިވާ ދިރާސާއެއްގައި ދައްކައިފައި ވަނީ ޗައިނާގެ ވެކްސިން އަކީ ހަސްފަތާލުގައި އެނދުމަތި ކުރުމުންނާއި މަރުއެތިފަހަރަކުން މީހާގެ ފުރާނަ ސަލާމަތް ކޮށްދޭ ވެކްސިނެއް ކަމަށެވެ. ޑެލްޓާ ވެރިއެންޓާއި ސައިނޯވެކް ވެކްސިންގެ ދިފާއާ ބެހޭ ގޮތުން ދިރާސާ ކުރެވިފައެއް ނުވެއެވެ.
ކުޑުސްގައި ޑެލްޓާ ވެރިއެންޓް ފެތުރެން ފެށީ ކުއްލިއަކަށެވެ. މެއި މަހުގެ މެދުތެރޭގައި 30 މީހުން އެނދުމަތި ކުރެވުނެވެ. ފަހުން ދުވާލެއްގެ މައްޗަށް 400 މީހުން ފައްސިވާން ފެށިއެވެ. ވެކްސިން ޖަހައިފައި ވަނިކޮށް، ޑޮކްޓަރުންނާއި ނަރުހުން މަރުވާތީ، އިންޑޮނޭޝިއާގެ މެޑިކަލް އެސޯސިއޭޝަން ވަނީ ގޮތް ހުސްވެފައެވެ. (ނިއުޔޯރކް ޓައިމްސް ރިޕޯޓް)
