ވަޒީފާގެ ދާއިރާއިން ހުށަހަޅާފައިވާ 38 މައްސަލަ އެއްވެސް އެޗްއާރްސީއެމް އިން އަންނަނީ ބަލަމުން ކަމަށް އެ ކޮމިޝަނުން ބުނެފި އެވެ.
އެ ކޮމިޝަނުން މިހެން ބުނީ ޕީއެސްއެމް ރާއްޖެ މިއަދު ޕްރޮގްރާމުގައި އެ ކޮމިޝަންގެ މަސައްކަތްތަކާއި ގުޅޭގޮތުން ވާހަކަ ދައްކަވަމުން ނެވެ.
އެޗްއާރްސީއެމް އިން ބުނީ ކޯވިޑްގެ ޙާލަތާއި ގުޅިގެން މިބާވަތުގެ މައްސަލަތައް ވަނީ އިތުރުވެފައި ކަމަށެވެ.
އެގޮތުން މުސާރަ ނުލިބުމުގެ މައްސަލައާއި، ވަޒީފާއިން ވަކިކުރުމުގެ މައްސަލަ، ބިދޭސީންނަށް ވަޒީފާނެތިފައި ތިބެން ޖެހުމުގެ އެތަކެއް މައްސަލައެއް ކޯވިޑުގެ ބަލިމަޑުކަމުގެ މުއްދަތުގައި ރިޕޯޓުކޮށްފައިވާކަމަށް އެ ކޮމިޝަނުން ބުނެފައި ވެއެވެ.
މީގެއިތުރުން ސިއްޙީ ދާއިރާއިން ހުށަހަޅާފައިވާ ގިނަ މައްސަލަތަކަކީ ވެސް ކޯވިޑާއި ގުޅިގެން ހުށަހަޅާފައިވާ މައްސަލަތައް ކަމަށް އެޗްއާރްސީއެމް އިން ވަނީ ފާހަގަކޮށްފަ އެވެ.
އެގޮތުން އިހުމާލުގެ މައްސަލަތަކާއި، ފަރުވާ ލަސްވުމުގެ މައްސަލަތަކާއި ޚިދުމަތް ނުލިބުމުގެ 38 މައްސަލައެއް ބަލަމުން އަންނަކަމަށް ވަނީ ބުނެފަ އެވެ. އަދި ޚާއްޞަ އެހީއަށް ބޭނުންވާ ފަރާތްތަކުގެ ޙައްޤުތައް ހޯދައިދިނުމުގެ 12 މައްސަލައެއް ވެސް ބަލަމުން އަންނަކަމަށް ބުންޏެވެ.
ކޮމިޝަނަށް ހުށަހަޅާފައިވާ މައްސަލަތަކުގެ ތެރެއިން މިއަހަރުގެ މިހާތަނަށް އިންސާނީ ޙައްޤެއް ގެއްލިޖެކަމަށް ކަނޑައަޅާ 9 މައްސަލައެއް ބަލައި ޙައްޤު ހޯދައިދީފައިވާ ކަމަށާއި މިއަހަރުގެ 5 ވަނަ ދައުރުގައި މިހާތަނަށް އެންޓި ޓޯޗަރ ޤާނޫނުގެ ދަށުން 5 މައްސަލައެއް ދައުވާކުރުމަށް ޕްރޮސެކިއުޓަރ ޖެނެރަލް އޮފީހަށް ފޮނުފައިވާކަމަށްވެސް ކޮމިޝަނުން ހާމަކުރައްވައެވެ.
މީގެ އިތުރުން މިއަހަރުގެ މިހާތަނަށް ޖުމްލަ 129 މައްސަލަ ބަލައި ނިންމާފައިވާކަމަށްވެސް ކޮމިޝަނުން ވިދާޅުވެއެވެ.
