އެމެރިކާއިން އީރާނާ ދެކޮޅަށް ދަތިކުރުމުގެ ފިޔަވަޅު އަޅާފައިވީނަމަވެސް އީރާނުގެ އެކްސްޕޯޓް އިތުރުވެ، އެގައުމުގެ ބަޖެޓް އަރަނި ވެފައިވާ ކަމުގައި ތެހެރާނުން ބުނެއެވެ. ތެހެރާނުން ނިއުކްލިއަރ ފައްކާ ކުރުމާ ގުޅިގެން އެމެރިކާގެ ޓްރަމްޕް ސަރުކާރުން 2018ގައި ދަތިކުރުމުގެ ފިޔަވަޅުތަކެއް އަޅައި އީރާނުގެ ތެޔޮ ގަތުން މަނާ ކުރިއެވެ. އޭގެ ސަބަބުން އިންޑިއާއާއި އޭޝިއާގެ އެހެން ގައުމުތަކުން އީރާނުގެ ތެޔޮ ގަތުން ހުއްޓައިލިއެވެ. އަދި މަދު އަދަދަކަށް ނަމަވެސް އީރާނުން ތެޔޮ ގަންނަމުން ދިޔައީ ޗައިނާއިންނެވެ.
އީރާންގައި ނިމިދިޔަ މާލީ އަހަރުގެ ކަސްޓަމްސްގެ މަލޫމާތު ހާމަކުރަމުން އެގައުމުގެ ކަސްޓަމުން ބުނެފައިވަނީ ޓްރަމްޕްގެ ދަތިކުރުމުގެ ފިޔަވަޅުތަކުގެ ސަބަބުން އީރާނުން ތެލާ ނުލައި އެހެން މުދާތައް އެކްސްޕޯޓް ކުރުން އިތުރުކޮށް އެކަމަށް ހިތްވަރު ލިބިގެން ގޮސްފައިވާ ކަމަށެވެ. އެގޮތުން މިމަހަށް ނިމިގެން މިދިޔަ މާލީ އަހަރުގައި އެކްސްޕޯޓް ވަނީ 68ޕަސެންޓަށް އިތުރު ވެފައެވެ. އަދި އީރާންގެ ބަޖެޓް އަރަނި ވެފައި ވަނީ 478 މިލިއަން ޑޮލަރުންނެވެ.
މިއިން ބޮޑު ބައެއް އެކސްޕޯޓް ކޮށްފައި ވަނީ ޗައިނާއަށެވެ. ދެން ތަރުތީބުން އިރާގަށާއި ޔޫއޭއީއަށެވެ.
އީރާނަކީ އަމިއްލަ އުފެއްދުން ތެރި ގައުމެކެވެ. އީރާނުން ގޭހާއި ކަރަންޓް ސަބްސިޑައިޒް ކޮށްފައިވާ ރޭޓެއްގައި އިރާގަށް ވިއްކައެވެ. އަދި ސޫރިޔާއާއި ވެނެޒުއެލާއާއި ޔަމަނަށް މާލީ ގޮތުން އެހީތެރިވެ ދެއެވެ.
އީރާނަކީ، ނިއުކްލިއަރ ގާބިލް، އަސްކަރީ އުފެއްދުމުގައި ކުރީގައި އުޅޭ ގައުމެކެވެ.
