ޗައިނާއަކީ، ކާމިޔާބު، ޒަމާނީ، ހަރަކާތްތެރި ގައުމެކެވެ. މިއީ ހުޅަނގުގެ ގައުމެއް ނޫނެވެ. އަދި ހުޅަނގުގެ މިންގަނޑުން މިނާއިރު، މިއީ ދުވަހަކު ކޮޅުންވެސް ޑިމޮކްރެސީއަކަށް ވާނެ ގައުމެއް ވެސް ނޫނެވެ. މިކަން މިހެން ވަނީ މިގައުމުގައި މީހުން ކިޔަވައިގެން ނެތީމައެއް ނޫނެވެ. މިއީ އެއްވެސް ގައުމަކުން ނުފެންނާނެ މިންވަރަށް ކިޔަވައިގެން ތިބި މޮޅެތި މީހުން ތިބި ގައުމެކެވެ. މިކަން މިހެން ވަނީ، މިގައުމުގެ މީހުން ފަގީރު ވީމައެއް ނޫނެވެ. މިއީ އެއްވެސް ގައުމެއްގައި ނެތް މިންވަރަށް މުއްސަނދީންވެސް ތިބި ގައުމެކެވެ.
ޗައިނާއަށް ޑިމޮކްރެސީ ގެނައުމަކީ، ހުޅަނގުގެ ވިސްނުމުގައި މީގެ ސަތޭކަ އަހަރު ކުރިންވެސް ބީހިލައި އުޅުނު ވިސްނުމެކެވެ. އެކަމަކު ކާމިޔާބު ވެފައިވާ ފިކުރެއް ނޫނެވެ.
ޗައިނާގެ ރައީސް ޝީއަކީ އުމުރު ދުވަހަށް މަގާމުގައި ބަހައްޓާފައިވާ އެގައުމުގެ ކޮމިއުނިސްޓް ލީޑަރެވެ. 21 ވަނަ ގަރުނަކީ ޗައިނާގެ ގަރުނުކަމުގައި ހެދުމަށް އޭނާ ވަނީ ޗައިނާގެ ސިޔާސީ މުސްތަގްބަލް ބިނާ ކުރައްވާފައެވެ. އެމެރިކާގެ ގަރުނު، 20 ވަނަ ގަރުނު ވަނީ އޮއްސިގެން ގޮސްފައެވެ.
ދުނިޔޭގައި ޚުދު މުޚުތާރު ނިޒާމުތައް އައިސް ގޮސްފައި ވެއެވެ. ސޯވިއެޓް ޔޫނިއަން ރޫޅިގެން ދިޔައީ ދާދި މިދާކަށް ދުވަހުއެވެ. ހުޅަނގުގައި ޗައިނާ ކޮމިއުނިސްޓް ޕާޓީ ސީޕީސީ ރޫޅިދާނެ ކަމަށްވެސް ބަލައި ހިސާބު ޖަހައެވެ. ޚުދު މުޚުތާރު ޕާޓީތަކެއް ކަމުގައިވިއަސް ރޫސީ ކޮމިއުނިސްޓް ޕާޓީ ރޫޅުނުހެން ޗައިނާ ސީޕީސީ ރޫޅިގެނެއް ނުދާނެއެވެ. ޗައިނާގެ ސީޕީސީ ހަމަ ހާސް ބައި ތަފާތެވެ.
ޗައިނާއިން އެކުލަވާލައިފައިވާ 2049ގެ މާރެސްއަކީ، ސާސްކަފްގެ މެދަށް ދާއިރުވެސް ޗައިނާގެ ރަތް ކަން ނުކެނޑި އޮފްދާރުކަމާއެކު އޮތުމަށް އެކުލަވައިލައިފައިވާ މާރެސްއެކެވެ.
ޑިމޮކްރެސީއަކުން ގައުމު ތިޔާގި ވާނެ ކަމާއި، ރައްޔިތުންގެ އުންމީދުތައް ހަގީގަތަކަށް ވާނެ ކަމުގެ ވާހަކަ ދެކެވެއެވެ. އެކަމަކު ޗައިނާގެ އާބާދިގެ ބޮޑުބަޔަކަށް މިއީ ބީރައްޓެހި ބަހުރުވައެކެވެ. މިކަން ޗައިނާގެ ސިޓީތަކަށް ވުރެން ބޮޑަށް ރަށްފުށުގެ ހިސާބުތަކުގައި އުޅެ، ރައްޔިތުންގެ އިހުސާސްތައް ބަލާލުމުން ރަނގަޅަށް އެނގިގެން ދާނެއެވެ.
ހުޅަނގުގެ މިނިވަންކަމާއި ޑިމޮކްރެސީއަށް ވާހަކަދައްކަވާ ފިލޯސަފަރުންގެ ވާހަކަތައް ތެދުނަމަ، އަދި އެ ފިކުރު ޗައިނާގައި އަށަގެންފިނަމަ، ޑިމޮކްރެޓިކް ޗައިނާ ވެގެންދާނީ ދުނިޔޭގެ އެންމެ ބާރުގަދަ ގައުމަށެވެ. ހުޅަނގުގެ ހުރިހައި ގައުމެއްގައިވެސް ތިބި ޗައިނާ މީހުންނަކީ މަތީ ފަންތިން އާމްދަނީ ލިބޭ މޮޅަށް އުނގެނިގެން ތިބި މީހުންނެވެ. އެއިރުން މިއެންމެންގެ ވަފާތެރިކަން އެނބުރިގެން ދާނީ މައި ފަސްގަނޑަށެވެ.
ހުޅަނުގެ ބައެއް ލިޔުންތެރި ބުނާ ގޮތުންނަމަ، ޗައިނާގެ ވެރިކަން ކުރާ ސީޕީސީ ރޫޅިގެން ދާނެއެވެ. ރޫސީވިލާތް ރޫޅިގެން ދިޔަ ގޮތަށެވެ. އެމެރިކާއިން ފެނިގެން ދާ މަންޒަރުތަކުން އެނގެނީ، ޑިމޮކްޓިކް ވިއަސް އަދި ޚުދު މުޚުތާރު ވިއަސް ކޮންމެ ނިޒާމެއްގައިވެސް އަމިއްލައަށް ހަލާކުވެގެން ދިއުމުގެ ސިފަތައް ލިޔެވިފައި ހުންނަ ކަމެވެ. އެމެރިކާގެ ޓްރަމްޕްގެ ވެރިކަމުގައި އާއި، ވެރިކަން ބަދަލު ވިއިރު، ގާނޫނު ހަދާ މަޖިލީހަށް ހަވަރު އެއްކުރުމުން އެނގިގެން ދިޔައީ ޑިމޮކްރެޓިކް ވިއަސް ޚުދު މުޚުތާރު ވިއަސް އެންމެންވެސް ތިބެނީ ހަލާކާއި ކައިވަތެއްގެ ދުރުމިނުގައި ކަމަށެވެ.
ޗައިނާގައި ހުރި މައްސަލަތަކަކީ އެހެން ގައުމުތަކުގައި ނެތް މައްސަލަތަކެއް ނޫނެވެ. އާމްދަނީގެ ފަރަގަކީ ހުރިހައި ގައުމެއްގައިވެސް އޮތް މައްސަލައެކެވެ. ފަގީރުކަންވެސް ހަމައެފަދައެވެ. ޗައިނާއަކީ ފަގީރުކަން ނައްތާލުމުގައި ކާމިޔާބު ގައުމެކެވެ. ތިމާވެށްޓާއި ނަސްލީ ތަފާތު ކުރުމުގައި ޗައިނާގައި އުޅޭ މައްސަލަތަކަކީ އެހެން ހުރިހައި ގައުމަކުންވެސް އިވޭ ވާހަކަތަކެވެ.
ޗައިނާގެ ބޯދާ ޒަމާނުގެ ޔެރޯ އެމްޕެރަރގެ ވެރިކަމުން ރައިސް ޝީގެ ވެރިކަމާ ހަމައަށް ބަލާއިރު، ޗައިނާގެ އެހާރާއި މިހާރުގެ ވެރިކަން ޚުދުމުޚުތާރުކަމުގައި ދާދި އެއްގޮތެވެ. އެކަމަކު ތަފާތު ކުރެވިދާނެ ބައެއް ކަންކަން އެބަހުއްޓެވެ. އީސާގެ ފާނު އުފަންވެ ވަޑައިގަތުމުގެ 2070ން ފެށިގެން ޖުމްހޫރިއްޔާއެއް 1912ގައި ގާއިމް ވުމާ ހަމައަށް ރަސްކަލުން ވެރިކަން ކުރެއްވި އިރު ޒިންމާވާ ފަރާތަކަށް ހުންނަވަނީ ޗައިނާގައި ރަސްގެފާނު ގިނިކަންޏާއެވެ.
މިހާރުގެ ޗައިނާގައި ރައީސް ޝީ، ކަމަކަށް ޒިންމާ ވެވަޑައިގަތުމުގެ ކުރިން އެކަމަށް ސަރުކާރު ޒިންމާ ވާނެއެވެ. އަދި ސަރުކާރު ނެތް ނަމަ، ސީޕީސީ އެކަމަށް ޒިންމާވާން ޖެހޭނެވެ. ހުރިހައި ގޮތަކުންވެސް ރައީސް ޝީ ޒިންމާއިން ބަރީއަވެ ވަޑައިގަންނަވައެވެ.
ޗައިނާގައި ޗެއަރމަން މާއޯއަށް ފަހު ދުވަހަކުވެސް ވެރިއަކު ބާރުގަދަ ނުވާ މިންވަރަށް ރައިސް ޝީ ވަނީ ވެރިކަމުގައި ބާރުގަދަ ކުރައްވާފައެވެ.
ދެން އޮތީ ޗައިނާ ރޫޅިގެން ދިއުމުގެ ވާހަކައެވެ. އެންމެ ފަހުގެ ވެރިކަމުގެ ޚާންދާން ޗިންގ ގެ ވެރިކަން ރޫޅިގެން ދިޔައިރު ޗައިނާ އޮތީ ހަނގުރާމަވެރި ފަރާތްތަކެއްގެ މެދުގައި ލޫދިފައެވެ. މިހާރުގެ ޒަމާނީ ޗައިނާއަށް އެފަދަ ގޮތެއް ވުމާ ދުރެވެ. މިދިޔަ 100 އަހަރު ތެރޭގައި ޗައިނާ އިން ވަނީ ވެރިކަމުގެ ނިޒާމުގެ ސަގާފަތަކާއި ގައުމިއްޔަތަކާއި ބާރުތައް ބެހުމުގެ ނިޒާމެއް ކާމިޔާބު ކަމާއެކު ގާއިމް ކޮށްފައެވެ.
އެމެރިކާއާއި ހުޅަނގުން ހިންގި ޑިމޮކްރެޓިކް ޕްރޮޖެކްޓްތައް ފެއިލްވީ މަންޒަރު ފެންނަނީ އިރާގާއި އަފްޣާނިސްތާންގައެވެ. ހަނގުރާމަވެރިކަމުގެ ބާރު އޮތް ފަރާތްތައް މި ދެ ގައުމުގައިވެސް އެމެރިކާއަކަށް ބައްޔެއް ނުކުރެވުނެވެ. އަދި އެފަރާތްތައް އެމެރިކާއަކަށް ލަންބައެއް ވެސް ނުލެވުނެވެ. އެކަމަކު އެމެރިކާގެ ޑިކޮކްރެސީގެ ޕްރޮޖެކްޓް ޖަޕާނާއި ޖަރުމަންވިލާތުގައި ކާމިޔާބު ވިއެވެ. ތަފާތަކީ، ޖަޕާނުގެ ސަމޫރާއީ ހަނގުރާމައިގެ ބާގައިގެ މީހުންނާއި ޖަރުމަންވިލާތުގެ ނާޒީ ބާގައިގެ މީހުން ނައްތާލުމުގައި އެމެރިކާ ކާމިޔާބު ވުމެވެ.
މީގެ މިލިއަން އަހަރު ކުރިން ޗައިނާގައި ވެރިކަން ކުރަމުން އައިގޮތަށް އަދިވެސް ޗައިނާ ކުރިއަށް ދާނެއެވެ. ޑިމޮކްރެސީގެ ޕްރޮޖެކްޓަކީ ޔެރޯ އެމްޕެރަރގެ ދަރިންނަށް ބީރައްޓެހި ނިޒާމެކެވެ.
