ޕާކިސްތާނަށް ނުރައްކާ ކުރާ ފަސްހާހެއްހައި ހަނގުރާމަ ވެރިން އަފްޣާނިސްތާންގައި ތިބި ކަމަށް ޕާކިސްތާންގެ ޚާރިޖިއްޔާއިން ބުނެފިއެވެ. ޕާކިސްތާނުން ބުނަނީ ތަހްރީކޭ ތާލިބާން ޖަމާއަތުގެ މީހުން އަފްޣާނިސްތާންގައި ބަޑަހަ ޖަހައިގެން، ޕާކިސްތާނަށް ނުރައްކާ ކުރާ ކަމަށެވެ.
އަފްޣާނިސްތާނުން މީގެ ކުރިން ބުނެފައި ވަނީ މި ނަން ކިޔާ ޖަމާއަތެއް އަފްޣާނިސްތާންގައި ނެތް ކަމަށެވެ. އަދި އެފަދަ ނަމެއް ކިޔާ ބަޔަކު އަފްޣާނިސްތާނުން ޕާކސްތާނަށް ހަމަލަވެސް ނުދޭ ކަމަށެވެ.
ތަހްރީކޭ ތާލިބާނޭ ޕާކިސްތާންގެ ނަމުގައި ޖަމާއަތެއް އުޅޭކަން އދން ވަނީ ކަށަވަރު ކޮށްދީފައެވެ. އދގެ މޮނީޓަރިންގ ޓީމުން ޖޫން 2021ގައި ތައްޔާރުކޮށް ހުށަހެޅި 12 ވަނަ ރިޕޯޓްގައި ބުނެފައި ވަނީ، ތަހްރީކޭ ތާލިބާން ނަމަކަށް ކިޔާ ޖަމާއަތަކީ ޕާކިސްތާނާ ދެކޮޅެވެރިކަމެއް ގެންގުޅޭ ޖަމާއަތެއް ކަމަށެވެ. އަދި މިމީހުންނަކީ ޕާކިސްތާން އަފްޣާނިސްތާން ސަރަހައްދުގައި އަފްޣާނިސްތާނާ ވީ ފަރާތުން އޮޕަރޭޓް ކުރާ ބައެއް ކަމަށެވެ. މިމީހުންނަކީ ޕާކިސްތާންގެ ސަލާމަތަށް އޮތް ނުރައްކަލެއް ކަމަށްވެސް ބުނެފައި ވެއެވެ.
