ސިޔާސީ ގޮތުންނާއި އިގްތިސާދީ ގޮތުން އެމެރިކާއާ އެންމެ ވާދަވެރި ގައުމަކީ ޗައިނާ ކަމަށް ބުނަމުން އެމެރިކާގެ ސެނެޓުން ޗައިނާއާ ވާދަކުރުމަށް 275 ބިލިއަން ޑޮލަރަށް ވުރެން ގިނައިން ހޭދަ ކުރުމާ ބެހޭ ގާނޫނު ފާސްކޮށްފިއެވެ. މިގާނޫނަށް ދީފައިވާ ނަމަކީ، ޔޫއެސް އިނޮވޭޝަން އެންޑް ކޮމްޕެޓިޝަން އެކްޓް 2021 އެވެ.
މިބިލްގެ މަގްސަދަކީ ޓެކްނޮލޮޖީގެ ރިސާޗްގެ ދާއިރާއާއި ޓެކްނޮލޮޖީގެ އުފެއްދުމުގެ ދާއިރާގައި އެމެރިކާއަކީ އެންމެ ކުރިއަރާފައިވާ ގައުމުކަމުގައި ހެދުމެވެ.
މިއީ ސައިންޓިފިކް ރިސާޗަށް އެމެރިކާއިން މިހާތަނަށް ފާސްކުރި އެންމެ ބޮޑު ބަޖެޓެވެ. އަދި ސިނާއީ އުފެއްދުމާ ގުޅޭ ގޮތުން އެމެރިކާއިން ތާރީޚްގައިވެސް ފާސްކުރި އެންމެ ބޮޑު އަދަދެވެ.
މިބިލްގައި ބުނެފައިވާ ގޮތުން ޗައިނާއާއި ސިޔާސީ ގޮތުންނައި އިގްތިސާދީ ގޮތުން ވާދަކުރުމަކީ، އެމެރިކާ ސަރުކާރުގެ މައިގަނޑު ސިޔާސަތެއްކަން ސަރުކާރުގެ ކޮންމެ އިދަރާއަކަށްވެސް އެނގިފައި އޮންނަން ވާނެއެވެ. މިބިލްގައި ކަނޑައަޅާފައިވާ ފައިސާ ޚަރަދު ކުރާނީ:
190 ބިލިއަން ޑޮލަރު: ޔުނިވަރސިޓީ ރިސާޗްއާއި އާޓިފިޝަލް އިންޓެލިޖެންސާއި ޑްރޯންއާއި އާއީޖާދުގެ ދާއިރާއަށް
10 ބިލިއަން ޑޮލަރު: ސްޕެޝަލް އިކޮނޮމިކް ޒޯންތައް ގޮތަށް ތައްޔާރު ކުރާ ރީޖަނަލް ޓެކްނޮލޮޖީ ހަބްތަކަށް
52 ބިލިއަން ޑޮލަރު: ސެމީ ކޮންޑަކްޓަރ އުފެއްދުމުގެ ދާއިރާއަށް
23 ބިލިއަން ޑޮލަރު: ޖައްވީ އިދާރާއާއި އެދާއިރާގެ ކަންކަން ތަރައްގީ ކުރުމަށް
މިބިލްގައި ހިމަނާފައިވާ އެހެން ކަންތައްތަކުގެ ތެރޭގައި ކޮރޯނާ ވައިރަސް އުފެދިގެން އައި ގޮތް ހޯދުމާއި، ސަރުކާރުގެ އާލާތްތަކުގައި ޓިކްޓޮކް ބޭނުން ކުރުން މަނާ ކުރުމާއި، ޝިންޖިއާންގައި އިންސާނީ ހައްގަށް އަރައިގަންނަ ފަރާތްތަކާއި އެމެރިކާގެ ޓެކްނޮލޮޖީން ވައްކަން ކުރާ ފަރާތްތަކަށް ދަތިކުރުމުގެ ފިޔަވަޅު އެޅުންވެސް ހިމެނެއެވެ.
ޗައިނާއިން ބުނެފައި ވަނީ މިއީ ޚިޔާލީ ދުޝްމަނާކާ ދެކޮޅަށް ފިނިހަނގުރާމައިގެ ވިސްނުމަކުން ފިޔަވަޅު އެޅުމަށް އެމެރިކާ ކުރާ މަސައްކަތެއް ކަމަށެވެ.
