ސްރީލަންކާގައި މަސައްކަތް ކުރާ އިރު، ޗައިނާ މީހުން ސިފައިންގެ ހެދުމުގައި މަސައްކަތް ނުކުރާން އެމީހުން ހޭލުންތެރި ކުރުމަށް ޗައިނާ އެމްބަސީ ގާތުން ސްރީލަންކާ ސަރުކާރުން އެދެފިއެވެ. ސިފައިންގެ ޔުނިފޯމް ލައިގެން ޗައިނާ މީހުން ލަންކާގައި މަސައްކަތް ކުރާކަން އާންމުންގެ ސަމާލުކަމަށް އައިސްފައި ވަނީ ލަންކާ ފަސްޓް އިން ގެނެސްދިން ވީޑިއޯ ރިޕޯޓަކާ ގުޅިގެންނެވެ.
މި މައްސަލާގައި ޗައިނާ އެމްބަސީއާ ވާހަކަ ދައްކާފައި ވަނީ ސްރީލަންކާގެ ޑިފެންސް ސެކެޓްރީއެވެ. އަދި މީޑިއާ ރިޕޯޓް ކޮށްފައިވާ ގޮތުން މިމީހުންނަކީ، ޗައިނާ ސިފައިންގެ ތެރޭގައި ހިމެނޭ ބައެއް ނޫންކަންވެސް ޗައިނާ އެމްބަސީން ވަނީ ކަށަވަރު ކޮށްދީފައެވެ.
ސްރީލަންކާގެ ދިފާއީ ވުޒާރާއިން ވަނީ އަމިއްލަ ކުންފުނިތަކަށްވެސް މިފަދަ މައްސަލަތައް ތަކުރާރުވިޔަ ނުދިނުމަށް އަންގާފައެވެ.
ޗައިނާ މުވައްޒަފުން މި މައްސަލާގައި ގާނޫނާ ޚިލާފްވެފައި ވޭތޯ ބެލުމަށް ތަހްގީގެއްވެސް ލަންކާގައި ހިންގައިފައި ވެއެވެ. ނަމަވެސް މިއީކީ އެފަދަ ހާލަތެއް ނޫން ކަމަށް ވަނީ ނިންމާފައެވެ.
