އިންޑިއާއިން އަމިއްލައަށް އުފައްދާފައިވާ މަތިންދާބޯޓް އުފުލާ މަނަވަރުގެ ޓެސްޓް ދަތުރުތައް މިމަހުގައި ފެށުމަށް ހަމަޖައްސައިފިއެވެ. އިންޑިއާގެ ދިފާއީ ވަޒީރު ވިދާޅުވާ ގޮތުން އައިއެންއެސް ވިކްރަންތު ކަނޑުގެ ސިފައިންގެ ޚިދުމަތަށް ނެރުމަށް ހަމަޖެހިފައި ވަނީ 2022ގެ މެދުތެރޭގައެވެ.
ސައުތު ޗައިނާ މޯނިންގ ޕޯސްޓުން ރިޕޯޓްކޮށްފައިވާ ގޮތުގައި އިންޑިއާގެ މަތިންދާ ބޯޓް އުފުލާ ދެވަނަ މަނަވަރު ވެގެންދާނީ އިންޑިއާ ކަނޑުގައި ޗައިނާއާ ވާދަ ކުރާނެ މުހިންމު އަސްކަރީ އުޅަނދަކަށެވެ.
ޗައިނާއިން ވަނީ އިންޑިއާ ކަނޑަށް ވާ ގޮތަށް ކެންޔާގެ ލާމޫ އައިލެންޑްގައި ބަނދަރެއް ހަދާފައެވެ. އަދި އިންޑިއާ ކަނޑަށްވާ ގޮތަށް 10 ބިލިއަން ޑޮލަރު އިންވެސްޓް ކޮށްގެން އިތުރު ބަނދަރެއް ޓެންޒޭނިއާގައި ހެދުމުގެ ވާހަކަތައްވެސް ވަނީ ފެށިފައެވެ.
މުހައްލިލުން ބުނާ ގޮތުން އިންޑިއާއަށް އެގައުމުގެ ދެބިތުގައި ދެ އަސްކަރީ ބާރުކަމަށްވާ ޗައިނާއާއި ޕާކިސްތާނާ ވާދަކުރުމަށް މަތިންދާބޯޓް އުފުލާ ދެމަނަވަރު ބޭނުން ވެއެވެ.
އިންޑިއާ ކަނޑުގެ ސިފައިންގެ ބައެއް ފަރާތްތަކުން ބާރު އަޅަމުން ދަނީ އިންޑިއާއިން ތިންވަނަ މަތިންދާބޯޓް އުފުލާ މަނަވަރެއްވެސް ބަނުމަށެވެ. ނަމަވެސް ނިއުދިއްލީގައި މިވާހަކައަށް އަދި މަގްބޫލުކަމެއް ލިބިފައެއް ނުވެއެވެ.
ޗައިނާގައިވެސް މަތިންދާ ބޯޓު އުފުލާ ދެ މަނަވަރު އޮވެއެވެ. އެއީ ރޫސީން ގެންގުޅުނު މަނަވަރެއް ބަދަލުކޮށްގެން ބޭނުން ކުރާ ބޯޓަކާއި އަމިއްލައަށް ބަނދެފައިވާ ބޯޓެކެވެ. އަދި ތިންވަނަ މަނަވަރެއް ބަނުމަށްވެސް ބެއިޖިންގ އިން ދަނީ މަސައްކަތް ކުރަމުންނެވެ. އަންނަ އަހަރުގެ ތެރޭގައި އެ މަނަވަރު ޚިދުމަތުގައި ބޭނުން ކުރަން ފަށާނެ ކަމަށް ބެލެވެއެވެ.
ކަނޑުގެ ސިފައިން ބުނާ ގޮތުން މަތިންދާ ބޯޓު އުފުލާ މަނަވަރުތަކަކަކީ ދުރަށް އުދުއްސުމަށާއި ދުޝްމަންގެ ބޯޓުތަކުގެ ބޯކޮޅު ބެލުމަށް މުހިންމު އަސްކަރީ އުޅަނދެކެވެ. އިންޑިއާއިން އެހެން ގައުމުތަކުގެ ކަނޑުގެ ސިފައިންނާއެކު އަސްކަރީ ތަމްރީންތައް ބޭއްވުން އިތުރު ކޮށްފައިވާތީ، މަތިންދާބޯޓު އުފުލާ އިތުރު މަނަވަރެއް އިންޑިއާއަށް މުހިންމު ކަމަށް މި ބޭފުޅުން ވިދާޅުވެއެވެ.
އިންޑިއާއިން އަދަން ކަނޑު އޮޅިހާ ހިސާބުގައިވެސް އަސްކަރީ ތަމްރީންތައް ބާއްވައެވެ. އަދި އެންމެ ފަހުން، މިދިޔަ ހޯމަ ދުވަހު އިންޑިއާ ސިފައިން ވަނީ، ދެކުނު ކޮރެއާއާއެކު ޗައިނާގެ ބިއްދޮށް ފަރާތުގައި އިރުމަތީ ޗައިނާ ކަނޑުގައިވެސް ތަމްރީންތައް ބާއްވައިފައެވެ.
