އަފްޣާނިސްތާންގެ ބަގްރާމް އެއަރ ބޭސްގައި 20 އަހަރު ހޭދަ ކުރުމަށްފަހު އެމެރިކާ ސިފައިން މިއަދު އެ ބޭސްއިން ފައިބައިފިއެވެ. 1950ގައި ރޫސީން ބިނާ ކުރި މި އަސްކަރީ މަރުކަޒު އޮތީ ތާލިބާންގެ ވެރިކަން ވައްޓާލިއިރު ވީރާނާވެފައެވެ. އެމެރިކާއިން މިތަނުން އަލުން ބިނާ ކުރީއެވެ. މިހާރު މިއީ ދެ މޭލުގެ ދިގު، ދެ ރަންވޭ އޮންނަ 30 އަކަ މޭލުގެ ބޮޑު ސަރަހައްދެކެވެ. މިތާގެ ދެ ރަންވޭއަށް ބޮޑެތި ހަނގުރާމަ މަތީ ބޯޓްތަކާއި، ބޮޑެތި ކާގޯ ބޯޓްތައް ޖެއްސެއެވެ.
އަފްޣާނިސްތާނުން އެމެރިކާ ސިފައިން ފައިބައިގެން ދިޔަ ނަމަވެސް ކާބުލްގެ އެއަރޕޯޓާއި އެމްބަސީތައް ދިފާއު ކުރުމަށް އެމެރިކާއިން 650 ސިފައިން އަފްޣާނިސްތާންގައި ބައިތިއްބާނެއެވެ. އަފްޣާނިސްތާނުގެ މުހައްލިލުން ބުނާ ގޮތުން ތާލިބާނުން ޙަމަލާތައް ވަރުގަދަ ކޮށްފައި ވާއިރު އެމެރިކާ ފައިބައިގެން ދިއުމުން، އަފްޣާނިސްތާނަށް އަމިއްލައަށް ދިފާއީ ފިޔަވަޅު އަޅަން މި ވަނީ ޖެހިފައެވެ. އަދި ފައިބައިގެންދާ ސިފައިން އެމީހުންގެ ވަޒަނުގައި ތިބެގެން 20 އަހަރު ވަންދެން އެމީހުން ދިފާއު ކުރި ތަންތަނަށް އަލުންވާ ގޮތްވެސް ބަލަބަލައި ތިބޭނެއެވެ.
ބަނގްރާމް ބޭސްގައި ދިހަ ހާހެއްހައި ސިފައިން އެއްފަހަރާ ތިއްބެވެ. މިތާގައި ސިނަމާ ހޯލާއި ސްޕާއާއި މުނިފޫހިފިލުވުމުގެ ވަސީލަތްތަކާއި، ފާސްޓްފުޑް ރެސްޓޯރެންޓްތައް ހަދާފައި ހުއްޓެވެ. މިތާގައި އެމެރިކާ ސިފައިން ހައްޔަރު ކުރާ ތާލިބާން މީހުންނަށް އަނިޔާ ކުރާ ޖަލެއްވެސް ހަދާފައި ހުއްޓެވެ. މިޖަލު މަޝްހޫރުވެފައި ވަނީ އަފްޣާނިސްތާންގެ ގުއަންޓަނާމޯގެ ނަމުންނެވެ.
