ތޫނުސްގެ ޕާލަމެންޓްގެ ތެރޭގައި ހިނގި ތަޅައިފޮޅުމެއްގައި އަންހެން މެމްބަރެއްގެ ކަންކަށީގައި ފިރިހެން މެންނަބަރކު ޖަހައިފިއެވެ. މިނިވަން މެމްބަރެއްކަމަށްވާ ސުބުހީ ސަމާރާ އަންހެން މެމްބަރު، އަބީރު މޫސާގެ ކަންކަށީގައި ޖެހީ، އަބީރު އަޑުގަދަކޮށް، މަޖިލިސް ރައީސް ރާޝިދުލް ޣަނޫޝީއާ ދެކޮޅަށް ހުރުބަސްތައް ރައްދުކުރަން ފެށުމުންނެވެ.
ތޫނުސް ސަރުކާރާއި މަޖިލިސް އަދި ސިޔާސީ ފަރާތްތަކުން ވަނީ އަބީރުގެ ކަންކަށީގައި ޖެހި މައްސަލަ ކުށްވެރި ކޮށްފައެވެ.
މިފޮޓޯގައި ފެންނަ ފަދައިން އަބީރަކީ މަޖިލިސްގައި އަޑުގަދަ މެމްބަރެކެވެ. މިއީ އޭނާ ހެލްމެޓް އަޅައިގެން މަޖިލީހަށް އައިސް އިން ދުވަހެއްގެ ފޮޓޯއެކެވެ.
ރާޝިދުލް ޣަނޫޝީއަކީ ތޫނުސްގެ އިސްލާމީ ޚިޔާލުގެ މުފައްކިރެކެވެ. ގިނަ އިސްލާމީ ފިކުރީ ފޮތްތަކެއް ލިޔުއްވުމަށްފަހު ބައިނަލްއަގްވާމީ ވަނަތަކެއް ހޯއްދަވާފައިވާ ބޭފުޅެކެވެ. ބުރުގީބާގެ ޑިކްޓޭޓަރޝިޕާ ގުޅިގެން އޭނާ ލަންޑަންގައި އެތައް އަހަރެއް ސިޔާސީ ހިމާޔަތުގައި ހޭދަ ކުރައްވާފައި ވެއެވެ. ކުރިން އޭނާއަކީ ދުނިޔޭގެ ދަންނަބޭކަލުންގެ ޖަމުއިއްޔާގެ ނާއިބް ރައީސެވެ.
ބުރުގީބާގެ އިލްމާނީ ސިޔާސަތާ ދެކޮޅަށް އިސްލާމީ ފިކުރު ފެތުރުމަށް އޭނާ ދަނީ މަސައްކަތް ކުރައްވަމުންނެވެ.
އަންހެނުންގެ ހައްގުގައި ކުރި ހޯދާފައިވާ ތޫނުސް މީހުން ވަނީ މީސްމީޑިއާގައި އަބީރާ ދެކޮޅަށް ވާހަކަ ދައްކާފައެވެ. މީހުން ބުނެފައިވަނީ އޭނާއަކީ މަޖިލިސްގައި ޒުވާބު ކުރާ ފިރިހެން ފަހުލަވާލެއް ކަމުގައެވެ.
