ފަލަސްތީނުގެ ސިފައިން އަނިޔާކޮށް މަރާލި ނިޒާރު ބަނާތުގެ މަރާ ގުޅިގެން ފަލަސްތީނުގެ ޖާސޫސީ އިދާރާއިން 14 މީހަކު ހައްޔަރުކޮށްފިއެވެ. މިމީހުންނަކީ އޭނާ ހައްޔަރު ކުރަން ގެއަށް ދިޔަ ސިފައިންގެ މީހުން ކަމަށް ބުނެވެއެވެ. އެކަމަކު ނިޒާރު ބަނާތުގެ ބައްޕަ ބުނާ ގޮތުން މިމީހުން ހައްޔަރު ކުރި ވާހަކަ އިޢްލާން ކުރިއަސް މިއީ ސީރިއަސް ވާހަކައެއް ކަމުގައި ބަލައިގަންނާކަށް ނުވާނެއެވެ. އޭނާ ތުހުމަތު ކުރާ ގޮތުގައި މި ބަޔަކު އައިސް އޭނާ ދަރިފުޅު ނަގައިގެން ދިޔައީ މަތިން ދިން އޯޑަރަކާ ގުޅިގެންނެވެ.
މި ކަމުގައި ހިމެނޭ ކަމަށް ފަލަސްތީނުގެ ޖާސޫސީ އިދާރާއިން ބުނާ ސިފައިން މިހާރު ވަނީ ރާމަﷲގެ ޖަލުގައި ބަންދުކޮށްފައެވެ.
ފަލަސްތީނަށް ކަނޑައަޅައިފައިވާ ޔޫރަޕްގެ އިއްތިހާދުގެ މަންދޫބު ވިދާޅުވީ މިވަރުން އަދި ނު ފުދޭނެ ކަމަށެވެ. ބަނާތު މަރާލި މައްސަލަ ތަހުގީގު ކުރަން ޖެހޭނީ މިނިވަން ވަކި ފަރާތަކަށް ނުޖެހޭ ބައެއް ކަމުގައި އޭނާ ވިދާޅުވިއެވެ.
ނިޒާރު ބަނާތަކީ މަހުމޫދު އަސްބާސްގެ ދޯހަޅި ސަރުކާރުގެ ކޮރަޕްޝަންގެ މައްސަލަތައް މީޙުންގެ ސަމާލުކަމަށް ގެނައުމަށް މަސައްކަތް ކުރި މީހެކެވެ. އަންނަ އިންތިޚާބުގައި އޭނާ ވަނީ ކެންޑިޑޭޓެއްގެ ގޮތުގައި ރަޖިސްޓްރީ ކޮށްފައެވެ.
