ސޫދާންގެ 90 އިންސައްތަ ދަރަނި މައާފް ކުރުމަށް ނިންމައިފިއެވެ. އިންޓަރނޭޝަނަލް މަނިޓަރީ ފަންޑު (އައިއެމްއެފް) އިން ބުނެފައި ވަނީ ސޫދާނުގެ އިންގިލާބީ ސަރުކާރަށް ހުށަހަޅާފައިވާ ހަރުކަށި ޝަރުތުތަކާއެއް ގޮތަށް އެގައުމުން ކާމިޔާބު ކަމާއެކު އަމަލު ކޮށްފައިވާތީ، އެގައުމުގެ ބޭރުގެ ދަރަނި މައާފް ކޮށްދޭން ނިންމާފައިވާ ކަމަށެވެ. އެކަމަކު ޝަރުތަކާއެކު ގައެވެ.
އިންޓަރނޭޝަނަލް މަނިޓަރީފަންޑުގެ ބަސް އަހައިގެން އުޅެފިނަމަ ސޫދާންގެ ބޭރުގެ ދަރަނީގެ 90 ސައްތަ ތިން އަހަރުގެ ތެރޭގައި، މައާފް ވެގެން ހިނގައިދާނެއެވެ.
ސޫދާންގެ ބާރުގަދަ މީހާ، ޑިކްޓޭޓަރު ހަސަން އަލްބަޝީރުގެ ވެރިކަމުގައި 30 އަހަރު ވަންދެން އެހަކެރި ކަމާއެކު ސޫދާން އޮތީ ބައިނަލްއަގްވާމީ މާލީ ނިޒާމުން ބާކީ ކޮށްލާފައެވެ.
ސޫދާންގެ ދަރަނި މައާފްކޮށްދެނީ، އައިއެމްއެފް އިން ގެންގުޅޭ، HIPC އިނިޝިއޭޓިވްގެ ދަށުންނެވެ. ހިޕްކް އަކީ، ހެވިލީ އިންޑެބްޓެޑް ޕުއަރ ކަންޓްރީޒްގެ ނަމުގައި ބޮޑަށް ދަރަނިވެރިވެފައިވާ ވަރަށް ފަގީރު ގައުމުތަކުގެ ދަރަނި މައާފް ކޮށްދިނުމަށް އައިއެމްއެފްއިން ގެންގުޅޭ ޕްރޮގްރާމެކެވެ.
މި ޕްރޮގްރާމުގެ ދަށުން 38 ވަނައަށް ދަރަނި މައާފް ކޮށްދެވޭނެ ގައުމަކީ ސޫދާނެވެ.
އައިއެމްއެފްއިން އެދެނީ ސޫދާނުން ރައްޔިތުންގެ ދިރިއުޅުމުގެ ހާލަތު ރަނަގަޅުކޮށް، އިގްތިސާދީ އިސްލާޙުތައް ތައާރަފްކޮށް، ފަގީރުކަން ނައްތާލުމަށް ސީރިއަސް މަސައްކަތްތަކެއް ކުރުމަށެވެ.
އައިއެމްއެފް އިން ބުނަނީ ސޫދާންގައި އަހުލީ ހަނގުރާމައާއި ހަމަނުޖެހުމުގެ ސަބަބުން ގައުމުގެ 44 މިލިއަން މީހުން ބިކަވެގެން ގޮސްފައިވާ ކަމަށެވެ.
