ޗައިނާއަށް ރަޝިޔާގެ ގޭސް ވިއްކުމަށްޓަކައި މޮންގޯލިއާ މެދުވެރިއަކަށް ހެދުމަށް ރަޝިޔާއިން ނިންމައިފިއެވެ. ރަޝިޔާއިން ވަނީ މޮންގޯލިއާގައި ގޭސް ކުންފުންޏެއް އުފައްދާފައެވެ. އަދި ސައިބީރިއާއިން ގެންދާ ގޭސް ހޮޅި، މޮންގޯލިއާއަށް ގެންދިއުމަށްވެސް ވަނީ ނިންމާ ފައެވެ. މުސްތަގްބަލުގައި ރަޝިޔާ ގޭސް ޗައިނާއަށް ވިއްކާނީ މި ހޮޅިންނެވެ.
މޮންގޯލިއާއަކީ ރަޝިޔާއާއި ޗައިނާއާ ދެމެދު ސަރަހައްދުގެ ގޮތުން ފިތިފައި އޮންނަ ގައުމެވެ. މޮންގޯލިއާގެ ޚާރިޖީ ވަޒީރާ މަގާމާ ޙަވާލުވެ ވަޑައިގަތުމަށްފަހު ފުރަތަމަ ދަތުރު ކުރެއްވީވެސް ރަޝިޔާއަށެވެ. އެކަމަނާގެ ދަތުރުފުޅުގެ ކުރިން މޮންގޯލިއާއިން ވަނީ އެގައުމުގެ ޖާސޫސީ އިދާރާގެ އިސް ދެމުވައްޒަފަކު ރަޝިޔާއަށް ޖާސޫސް ކޮށްދިން ކަމުގެ ތުހުމަތުގައި ޖަލަށް ލާފައެވެ.
ފޮރިން މިނިސްޓަރ ބަޓެސްޓެކް ބަޓްމުކްގެ ދަތުރުފުޅުގައި ރަޝިޔާއިން މިކަމާ ގުޅޭ ގޮތުން އެއްވެސް އެއްޗެއް ބުނެފައެއް ނުވެއެވެ.
ތިން މިލިއަން މީހުން ދިރިއުޅޭ މޮންގޯލިއާގެ ސިފައިންގެ 60 ޕަސެންޓް މީހުން ތަމްރީން ކުރަނީ ރަޝިޔާގައެވެ. ކުރިން އެމެރިކާގައިވެސް މޮންގޯލިއާ ސިފައިން ތަމްރީން ކޮށްފައި ވެއެވެ. އަދި އެމެރިކާއާއެކު މޮންގޯލިއާއިން އަސްކަރީ ތަމްރީންތައް ބާއްވާފައި ވެސް ވެއެވެ.
މޮންގޯލޮއާއިން ވަނީ އެގައުމުގެ "ތިންވަނަ އަވަށްޓެރިޔާ"ގެ ސިޔާސަތަށް ބަދަލު ގެނަސް ރަޝިޔާއަށް ސަމާލުކަން ދޭން ފަށާފައެވެ.
ޗައިނާއިންވެސް ދަނީ މޮންގޯލިއާގައި ވިޔަފާރީގެ މަސްލަހަތު ފުޅާ ކުރަމުންނެވެ. ޗައިނާއިން ވަނީ މޮންގޯލިއާ ހުރަސްކޮށް ރޭލެއްވެސް އަޅާފައެވެ. އަދި ޗައިނާއިން އެއްބަސްވެފައި ވަނީ މޮންގޯލިއާއިން ކޯލާ ދެލި ގަތުމަށެވެ. ކޯލާ ދެއްޔަކީ، މޮންގޯލިއާއަށް ކަޅު ރަނެވެ.
