އެކުވެރި އަރަބި އިމާރާތަށް ސިޔާސީ އިސްލާޙުތައް ގެންނަން ގޮވައިލި މީހުންނަށް ޖަލުޙުކުމް ކުރި މުނާސަބާއަށް ނުވަ އަހަރު ފުރުން އިއްޔެ ފާހަގަ ކޮށްފިއެވެ. އިމާރާތުގައި ސިޔާސީ މިނިވަންކަން ފުޅާކުރުމަށާއި ޕާލަމެންޓެއް އުފެއްދުމަށް އެދި މަސައްކަތް ކުރި މީހުން އަދިވެސް ތިބީ ޖަލުގައެވެ.
އިންޓަރނޭޝަނަލް ކެމްޕެއިން ފޯރ ފްރީޑޮމް އިން ދަ ޔޫއޭއީގެ ފަރާތުން ވަަނީ ލަންޑަންގައި ހުންނަ ޔޫއޭއީގެ އެމްބެސެޑަރަށް ސިޔާސީ ކުށްވެރިން މިނިވަންކޮށް ދިނުމަށް އެދި ސިޓީއެއް ފޮނުވާފައެވެ.
ޔޫއޭއީގައި ސިޔާސީ މިނިވަންކަމަށް ގޮވައިލި 94 މީހުންނަށް ޖުމުލަ 500 އަހަރުގެ ޖަލު ޙުކުމެއް އިއްވާފައި ވެއެވެ. ބައެއް މީހުންނަށް ޙުކުމް ކޮށްފައި ވަނީ އެމީހުންގެ ގައުމުން ބޭރުގައި ތިއްބައެވެ. މީގެ ތެރޭގައި ކިޔަވާ ކުދިންނާއި ލޯޔަރުންނާއި މުދައްރިސުންނާއި އެކަޑެމިކުންނާއި އެކި ދާއިރާތަކުން ތަޖުރިބާކާރުން ހިމެނެއެވެ.
އެމްނެސްޓީ އިންޓަރނޭޝަނަލުންވެސް މިމުނާސަބާގައި ގޮވާލައިފައި ވަނީ މިމީހުން މިނިވަން ކުރުމަށެވެ. ޔޫއޭއީން މި މީހުން ބަންދު ކޮށްގެން ގެންގުޅެމުން ދަނީ އެކަހެރިކޮށެވެ.
މިޑްލްއީސްޓް އައި އިން ރިޕޯޓް ކުރިގޮތުގައި، އެމެރިކާ ކޮންގްރެސްގެ ޓޮމް ލާންޓޯސް ހިއުމަންރައިޓްސް ކޮމިޝަންގެ ރައީސް ކޮންގްރެސްމަން، ޖިމް މެކްގަވަންވެސް ވަނީ ޔޫއޭއީން ސިޔާސީ ކުށްވެރިން މިނިވަން ކުރުމަށް ގޮވައިލާފައެވެ.
ސިޔާސީ ކުށްވެރިންގެ ޝަރީއަތް ދުނިޔޭގައި މަޝްހޫރުވެފައި ވަނީ ޔޫއޭއީ94ގެ ނަމުންނެވެ. މިމީހުންގެ މައްސަލަ މިއަހަރު އިތުރަށް ފާޅުވެގެން ދިޔައީ، 94 މީހުންގެ ތެރޭން ޖަލަށްލާފައިވާ މުހައްމަދުއް ސިއްދީގްގެ ދަރިފުޅު އާލާއުއް ސިއްދީގް ލަންޑަންގައި މިފަހުން ކާރު އެކްސިޑެންޓެއްގައި މަރުވުމާ ގުޅިގެންނެވެ.
މިމީހުންގެ ތެރޭން ބައެއް މީހުންނަށް ކުރި ޙުކުމްގެ މުއްދަތު ހަމަވިއިރުވެސް މިމީހުން މިނިވަންކޮށްފައި ނުވާކަމަށް އެމްނެސްޓީ އިންޓަރނޭޝަނަލުން ވަނީ އިއްޔެ ބުނެފައެވެ. އެމްނެސްޓީން ބުނިގޮތުގައި އާލާއުއް ސިއްދީގްގެ ފިރިމީހާ، ޢުމްރާން އައްރުޟުވާންގެ ޖަލު ޙުކުމުގެ މުއްދަތު ހަމަވުމަށްފަހުވެސް އަދިވެސް އޭނާ ހުރީ ބަންދުގައި ބަހައްޓާފައެވެ.
އާލާއުއް ސިއްދީގަކީ، ލަންޑަންގައި ގަލްފްގެ ގައުމުތަކުގެ ސިޔާސީ ކުށްވެރިން މިނިވަން ކުރުމަށް ގޮވާލުމަށް ޖަމުއިއްޔާއެއް ހަދައިގެން މަސައްކަތް ކުރި މީހެކެވެ.
މަޢްލޫމާތުގެ ރަސްމަގުގައި އިއްޔެ އަޑު އުފުލި މީހުން ބުނެފައި ވަނީ އޫއޭއީ94ގެ މީހުންނަށް ޖިސްމާނީ ގޮތުންވެސް އަނިޔާކޮށް ހަދައިފައިވާ ކަމަށެވެ
