އަންހެނުންނަށް އަނިޔާކުރުން ހުއްޓުވާ މުއާހަދާއަކުން ތުރުކީވިލާތުން ބޭރުވެގަތުމުން، މީހުން މުޒާހަރާއަށް ނިކުމެއްޖެއެވެ. ތުރުކީން ބޭރުވެގަތް މުއާހަދާއަކީ އަންހެނުންނާ ދެކޮޅަށް އަނިޔާކުރުން ހުއްޓުވުމަށް ޔޫރަޕްގެ ކައުންސިލުން ފާސްކޮށްފައިވާ އިސްތަމްބޫލް މުއާހަދާއެވެ. މިއީ ޔޫރަޕްގެ ކައުންސިލްގެ މުއާހަދާއަކުން މެމްބަރަކު ބޭރުވެގަތް ފުރަތަމަ ފަހަރެވެ.
ތުރުކީ ރައީސް ރަޖަބް އެރްދޮޣާން ވިދާޅުވަނީ އޭނާގެ ގައުމުން ފާސްކޮށްފައިވާ ގާނޫނުތައް އަންހެނުންނަށް އަނިޔާ ކުރާ މީހުންނަށް އަދަބު ދިނުމަށް ފުދޭ ކަމަށެވެ.
ތަކްސިމް މައިދާނުގައި މުޒާހަރާއަށް ނިކތް މީހުން ބުނެފައި ވަނީ އިސްތަމްބޫލް މުއާހަދާއިން ތުރުކީ ބޭރުވެގެން ދިއުމުން ބިރަކާ ނުލައި އަންހެނުންނަށް އަނިޔާ ކުރާ މީހުން އެކަން ކުރާނެ ކަމަށެވެ. އަދި އެކަމާ ދެކޮޅަށް އަޑު އުފުލާންވެސް މީހުން ޖެހިލުވާނެ ކަމަށެވެ.
