ގަދަ ބާރުން އަފްޣާނިސްތާނަށް އަރައި 20 އަހަރު ދުވަސްވަންދެން ބާރު ދެއްކުމަށްފަހު މިއަދު، އެމެރިކާގެ ރައީސް އަފްޣާނިސްތާންގެ ނަން އަޑު އަހާކަށްވެސް ބޭނުން ފުޅެއް ނުވެއެވެ.
ނޫސްވެރިންނާއެކު ބޭއްވެވި ބައްދަލުވުމެއްގައި އަފްޣާނިސްތާނާ ބެހޭ ގޮތުން ސުއާލު ދެންނެވުމުން ރައީސް ޖޯ ބައިޑެން ވިދާޅުވީ "އަފްޣާނިސްތާންގެ ނަން އަޑުއަހާކަށް ބޭނުން ނޫން" ކަމުގައެވެ. ދެން އިއްވެވީ، އޭނާގެ ވެރިކަމުގައި އެމެރިކާއިން ހޯދަމުންދާ ކާމިޔާތަކުގެ ލިސްޓެވެ. އަދި 40 އަހަރު ތެރޭ އިގްތިސާދު ކުރި ނައަރާ މިންވަރަށް މިހާރު އިގްތިސާދު ކުރި އަރަމުންދާ ކަމަށް ވިދާޅުވެވުނު ހިސާބުން އޭނާއަށް އެޅުނު ޅައެތި އިޙުސާސް ކުރެވުނެވެ. ފޮނި ވާހަކަތަކެއް ދެއްކެވުމަށްފަހު ކުއްލިއަކަށް ވިދާޅުވީ، ނޫސްވެރިންގެ "ނެގެޓިވް" ސުއާލުތަކަށް މިހާރު ޖަވާބު ނުދެއްވާނެ ކަމަށެވެ. ދެންވެސް، އޭނާއަށް ވިދާޅުވެވުނު އެއްޗެއް އިޙުސާސް ކުރެވިގެން އަލުން، ޖުމުލަ ރަގަޅު ކުރައްވަމުން ވިދާޅުވީ "ނެގެޓިވްއެއް ނޫން، ލެޖިޓިމޭޓް ސުއާލުތައް" ކަމުގައެވެ.
ދޮށީ އުމުރުގެ މިރައީސްގެ ފަރާތްޕުޅުން މިގޮތަށް، ބައެއް ކަންކަން އަތްދަށުން ދާކަން ފާހަގަ ކުރެވެއެވެ.
އަފްޣާނިސްތާން ރޭޑިއޯއިން މި ޚަބަރު ގެނެސްދެމުން މިއަދު ބުނެފައި ވަނީ އަފްޣާނިސްތާނާ މެދު އެމެރިކާގެ ސިޔާސަތު މިހާރު ސާފު ވެއްޖެ ކަމަށެވެ. އަދި އަފްޣާނިސްތާންގެ ނަންވެސް އަޑުއަހާން އެމީހުން ބޭނުން ނުވާ ކަމަށެވެ.
މީގެ ތިން ގަޑިއިރު ކުރިން އަފްޣާނިސްތާންގައި އިޢްލާން ކޮށްފައި ވަނީ އަފްޣާނިސްތާންގައި ތިބި އެމެރިކާ ސިފައިންނާއި ނޭޓޯ ސިފައިންގެ އިސް ކޮމާންޑަރު، ޖެނެރަލް ސްކޮޓް މިލަރވެސް މިއަދު އަފްޣާނިސްތާނުން ފައިބައިގެން ހިނގައްޖެ ކަމަށެވެ. އެމެރިކާ ސިފައިން ވަނީ 20 އަހަރު ވަންދެން އެމީހުން ބަނޑަހަ ޖަހައިގެން ތިބި ބަގްރާމް އެއަރބޭސް ވެސް އަފްޣާނިސްތާނާ ޙަވާލު ކޮށްފައެވެ.
