ބަލޯޗިސްތާންގައި ޓެލެކޮމިއުނިކޭޝަން ޕްރޮޖެކްޓްތައް ހިންގާ ޗައިނާ ކުންފުނިތަކުގެ މަސަލަހަތުތަކަށް ހަމަލަ ދީ، އެތަންތާގައި މަސައްކަތް ކުރާ މީހުން ހިފަހައްޓާފައިވާ ކަމަށް ބަލޯޗިސްތާން ލިބަރޭޝަން އާމީން ބުނެފިއެވެ. ބަލޯޗިސްތާން ލިބަރޭޝަން އާމީން މިއަދު މި ޚަބަރު ހާމަކުރަމުން ބުނެފައި ވަނީ މިކަން ކޮށްފައި ވަނީ މިދިޔަ މަހުގެ 26 ގައި ކަމަށެވެ.
ބަލޯޗް ލިބަރޭޝަން އާމީން ބުނިގޮތުގައި މިމީހުން މިނިވަން ކުރާނީ، ރެޑް ކްރެސެންޓް ނުވަތަ އދން މެދުވެރިވެގެންނެވެ. އަދި އެމީހުން ސިފަ ކުރިގޮތިގައި މިމީހުންނަކީ ޕާކިސްތާން ސިފައިންނަށް ޖާސޫސް ކޮށްދޭ ބައެކެވެ.
ބަލޯޗިސްތާންގައި ޗައިނާއިން ހިންގާ ޕްރޮޖެކްޓްތަކަށް ދޭތެރޭން ބަލޯޗް ހަނގުރާމަވެރިން ހަމަލަ ދެއެވެ. އަދި މި ސަރަހައްދުގެ ހާލަތުގެ ނާޒުކު ކަމުން ޕާކިސްތާން ސިފައިންވެސް މިމީހުންނަށް ރައްކާތެރިކަން ފޯރު ކޮށްދެއެވެ.
ބަލޯޗިސްތާނު ލިބަރޭޝަން އާމީން ބުނާ ގޮތުގައި ޗައިނާއިން ބަލޯޗިސްތާންގައި ގާއިމް ކުރާ ޓެލެކޮމިއުނިކޭޝަން އިންފްރާސްޓްރަކްޗަރ އަކީ އެމީހުންގެ ބޯކޮޅު ބަލައި ފާރަ ލުމަށް ހިންގާ ޕްރޮޖެކްޓްތަކެވެ. މީގައި ވާވޭއާއި ޒެޑްޓީއީން ބައިވެރިވާ ކަމަށް މިމީޙުން ބުނެއެވެ.
