ޗައިނާ ކޮމިއުނިސްޓް ޕާޓީން ބޭއްވި 100 އަހަރު ފުރުމުގެ މުނާސަބާގައި އެމެރިކާގެ މީޑިއާއިން ޗައިނާއަށް ފަހިވާ ގޮތަށް ކަވަރޭޖް ދީފައިވާ މައްސަލާގައި ބައެއް ފަރާތްތަކުން ވަނީ ފާޑު ކިޔާފައެވެ. ޚާއްސަ ގޮތެއްގައި އެމެރިކާގެ މެއިންސްޓްރީމް މީޑިއާ ކަމުގައިވާ ފޮކްސް ނިއުސްއިންވެސް ޚަބަރުތައް ގެނަސްދީފައި ވަނީ ޗައިނާއަށް ފަހިވާ ގޮތަށެވެ. އެމެރިކާއަށް މީޑިއާއަށް ގިނަ އަދަދުން ފައިސާދީގެން ޗައިނާއަށް ފަހި މެސެޖް ގެނެސްދޭކަމަށް ވަނީ ތުހުމަތު ކުރެވިފައެވެ.
ޗައިނާ ސަރުކާރަށް ޕްރޮޕެގެންޑާ ކޮށްދިނުމަށް އެދިގެން ޗައިނާއިން އެމެރިކާގެ މީޑިއާއަށް މިދިޔަ ހަމަސް ދުވަސް ތެރޭ، ގިނަ އަދަދުން ފައިސާދީފައިވާ ކަމަށް އެމެރިކާގެ ޖަސްޓިސް ޑިޕާޓްމަންޓުން ބުނެއެވެ. ޖަސްޓިސް ޑިޕާޓްމެންޓްގެ ލިޔުންތައް ދައްކާ ގޮތުން ޓައިމް މެގެޒިންއާއި ފޮރިން ޕޮލިސީ މެގަޒިންއަށް ޗައިނާ ޑެއިލީން ސަޕްލިމެންޓްތަކާއި މަޒްމޫނުތައް ޝާއިއުކުރުވުމަށް ބޮޑެތި އަދަދުތަކުން ފައިސާ ދީފައި ވެއެވެ. ޓައިމް މެގަޒިންއަށް ހަތް ލައްކަ ޑޮލަރާއި ފައިނޭންޝަލް ޓައިމްސްއަށް 371ހާސް ޑޮލަރާއި، ފޮރިން ޕޮލިސީ މެގަޒިންއަށް ތިން ލައްކަ ޑޮލަރާއި އަދި އެނޫން އެހެން އިތުރު މީޑިއާގެ ތަފަތު ވަސީލަތްތަކަށް އެއް މިލިއަން ޑޮލަރު ހޭދަކޮށްފައިވާ ކަމަށެވެ.
އެމެރިކާގެ ދަ ޑެއިލީ ކޯލަރއިން ރިޕޯޓް ކުރިގޮތުގައި ޗައިނާ ޑެއިލީއިން ވަނީ 2016ގެ ނޮވެމްބަރުން ފެށިގެން، ވޮޝިންޓަން ޕޯސްޓަށްވެސް 4.6 މިލިއަން ޑޮލަރު ދީފައެވެ. އަދި ވޯލްސްޓްރީޓް ޖަރނަލްއަށް 6 މިލިއަން ޑޮލަރު ދީފައި ވެއެވެ.
އެމެރިކާގެ މީޑިއާގައި ވަނީ ޗައިނާ ވޮޗްގެ ނަމުން ސަޕްލިމެންޓްތައް ޝާއިއުކޮށްފައެވެ.
ޖަސްޓިސް ޑިޕާޓްމަންޓްގެ ލިޔުންތަކުން އެނގޭ ގޮތުގައި އެމެރިކާގައި ޕްރޮޕެގެންޑާ މަސައްކަތަށް 2016ން 20202ށް ޗައިނާއިން 11 މިލިއަން ޑޮލަރު ހޭދަކޮށްފައި ވެއެވެ.
އެމެރިކާގެ ޖަސްޓިސް ޑިޕާޓްމަންޓުން ބަލާ ގޮތުގައި ޗައިނާ ޑެއިލީއަކީ، ފޮރިން އެންޓުންގެ ކެޓަގަރީގައި ހިމެނޭ ފަރާތެކެވެ. އެހެންވެ، އެފަރާތުން ކުރާ ހޭދަތައް ޖަސްޓިސް ޑިޕާޓްމަންޓަށް ހާމަ ކުރަން ޖެހެއެވެ.
އެމެރިކާގައި މީޑިއާ މެސެޖް ކޮންޓްރޯލު ކުރުމަށް ޗައިނާ ބޭނުން ވަނީ ކޮރޯނާ ވައިރަސްއާ ގުޅިގެން ޗައިނާއާ ބެހޭ ގޮތުން އެމެރިކާއިން ނުރަނގަޅު ތަސައްވުރެން ގެނެސް ދޭން އުޅުމުންނެވެ.
