އަފްޣާނިސްތާންގައި އެމެރިކާ ސިފައިންނަށް އެހީވެދިން އެތައް ހާސް މީހުން ރެފިއުޖީންގެ ގޮތުގައި ބަލައިގަތުމަށް އެމެރިކާއިން މެދުތެރޭ އޭޝިއާގެ ތިން ގައުމެއްގައި އެދެފިއެވެ. އެމެރިކާ އިން ބޭނުން ވަނީ މިމީހުންގެ ވިސާގެ ކަންތައްތައް ހަމަޖެހެންދެން މި ގައުމުތަކުގައި އެމީހުން ބައިތިއްބައި ދިނުމަށެވެ. މިމީހުންގެ ވިސާ ހަމަޖެހެނީ ކޮން ގައުމަކަށް ކަން ސާފެއް ނޫނެވެ.
ވޮޝިންޓަނުގައި ވައިޓްހައުސްއިންވެސް ވަނީ މިކަމުގެ ތަފްސީލް ދިއުމަށް އުޒުރުވެރި ވެގެންފައެވެ.
އެމެރިކާގެ މަސްއޫލު ފަރާތްތަކުން މަޢްލޫމާތު ލިބޭ ގޮތުގައި މި ތިން ގައުމަކީ ކަޒަޚިސްތާނާއި އުޒުބެކިސްތާނާއި ތަޖިކިސްތާނެވެ. މި ގައުމުތަކުންވެސް އެމެރިކާއަށް ސާފު ޖަވާބެއް ދީފައެއް ނުވެއެވެ. އަދި މި ގައުމުތަކުން ޖަވާބެއް ލިބެން ވަގުތު ނަގާނެ ކަމަށް ވެސް ބެލެވެއެވެ.
އަފްޣާނިސްތާންގައި ތާލިބާނުން ވަނީ ހަމަލަތައް ވަރުގަދަ ކޮށްފައެވެ. އެމީހުން ދަނީ އުތުރުގައި ތަންތަން ހިފަމުންނެވެ. ކަންދަހާރު ކައިރީގެ ސްޓްރެޓިކް ސަރަހައްދެއް މިއަދު އެމީހުން ވަނީ އަތް ދަށު ލާފައެވެ. އަފްޣާނިސްތާނުން އިއްޔެ ޚަބަރުގައި ހާމަކުރި ބައެއް ފޮޓޯތަކުން ފެންނަނީ މީހުން ސާމާނު ކޮޅު ޕިކަޕަށް ލައިގެން ސަލާމަތުގެ އައްސޭރިފަށަށް ދަތުރުފަށާފައިވާ ތަނެވެ.
އެމެރިކާގެ ރައީސް ޖޯ ބައިޑެން ވިދާޅުވެފައި ވަނީ އެމެރިކާއަށް އެހީތެރިވެދިން މީހުން އެމެރިކާއިން ދޫކޮށް ނުލާނެ ކަމަށެވެ. އަފްޣާނިސްތާންގައި އެމެރިކާ ސިފައިންގެ ތަރުޖަމާނުންގެ ގޮތުގައާއި އެމީހުންނަށް އެކި މައްސައްކަތްތައް ކޮށްދިނުމުގައި ބައި ލައްކައެއްހައި މީހުން އުޅުނު ކަމަށް ވެއެވެ. މިމީހުން ވަނީ އެމީހުންނާއި އެމީހުންގެ އާއިލާތަކަށް ތާލިބާނުގެ ނުރައްކާ އޮތް ކަމަށް ބުނެފައެވެ.
ތާލިބާނަކީ ރަހުމުކުޑަ، އުންޑައިން ކަންކަން ނިންމާ ވައްތަރުގެ ހަރުކަށި އިސްލާމީ ބައިގަނޑެކެވެ.
