ޗައިނާއިން ދެކުނު ޗައިނާ ކަނޑުގައި ބާރު ދެއްކުމަށް ކުރަމުންދާ މަސައްކަތަކީ، ބައިނަލްއަގްވާމީ ގާނޫނާ ޚިލާފް އަމަލެކެވެ. މިދިޔަ އަހަރު ޗައިނާގެ ދިފާއީ ވަޒީރު ޖެނެރަލް ޗާންގ ވަންޝުއާން ގެ ގޮވައި ލެއްވުމަކީ މިކަމުގެ ހެއްކެކެވެ. އޭނާ ސިފަ ކުރެއްވިގޮތުގައި ދެކުނު ޗައިނާ ކަނޑުގައި ޗައިނާއިން ކުރާނެ ހަނގުރާމައަކީ، "ކަނޑުގައި ރައްޔިތުން ކުރާނެ ހަނގުރާމައެއް" ކަމަށެވެ.
ޗައިނާއިން ދެކުނު ޗައިނާ ކަނޑުގައި ގެންގުޅޭ ހަމަތަކަށް ބަލައިފިނަމަ، ވަޒީރުގެ ވާހަކަފުޅު ދޮގަކަށް ނުވެއެވެ.
ދަ ނޭޝަނަލް އިންޓަރެސްޓްގައި މި މައުޟޫއުގައި ލިޔަމުން، ޖޭމްސް ހޯލްމްސް މި ކަމަށް ތަފްސީލުކޮށް ބަލައިލިއެވެ. އޭނާ ބުނާ ގޮތުން ދެކުނު ޗައިނާ ކަނޑުގައި ޗައިނާއިން ހިންގާ ރައްޔިތުންގެ ހަނގުރާމައިގެ، ކެމްޕޭނެއްގެ މަގްސަދަކީ، އިންޓަރނޭޝަނަލް ޓްރައިބިއުނަލް ފޯރ ދަ ލޯ އޮފް ދަ ސީ އިން ކޮށްފައިވާ ޙުކުމާ ދެކޮޅަށް "އަމިއްލަ ސިޔާސަދު ދެމެހެއްޓުމަށް" ޗައިނާއިން މަސައްކަތް ކުރުމެވެ.
މި ޓްރައިބިއުނަލް އިން ނިންމާފައި ވަނީ، ދެކުނު ޗައިނާ ކަނޑުގެ 80އާއި 90 އިންސައްތަ އަކީ ޗައިނާގެ ސަރަހައްދެއްކަމަށް ބެއިޖިންގ އިން ކުރަމުން ދާ ދައުވާއަކީ، އދގެ ކަނޑުތަކުގެ މުއާހަދާގެ ދަށުން އަސްލެއް ނެތް ވާހަކައެއް ކަމަށެވެ.
ހޯލްމްސް ބުނާ ގޮތުން، ބާރުގަދަ ސަރަހައްދީ ގައުމަކަށް، ޖެހިގެން އޮންނަ ބޮޑު ކަނޑުގެ ސަރަހައްދު، އެހެން ކުދި އަވަށްޓެރިންގެ ހައްގަށް ހުރަސް އެޅޭގޮތަށް އަމިއްލަ ކޮށްލުމަކީ ވެގެން ވާނެ ކަމެއް ނޫނެވެ. އެއްވެސް ގައުމަކަށް މިފަދަ ކަމެއް ކުރެވޭނީ ގަދަ ބާރުން އެފަދަ ސަރަހައްދެއް އަމިއްލަ ސަރަހައްދުގެ ތެރެއަށް ވައްދައިގެންނެވެ. ނުވަތަ އަސްކަރީ ބާރު ދެއްކުމުގެ ގޮތުން ސިފައިން ބައިތިއްބައިގެންނެވެ.
ބެއިޖިންގ އިން ދެކުނު ޗައިނާ ކަނޑުގައި މިއަދާ ހަމައަށް ބާރު ދައްކާފައި ވަނީ ހަނގުރާމައެއް ކޮށްގެނެއް ނޫނެވެ. ނަމަވެސް ޗައިނާއިން އާދަވެގެން ގެންގުޅޭ ހަނގުރާމައިގެ އުކުޅުތައް ބޭނުން ކޮށްގެންނެވެ.
ދަ ނޭޝަލް އިންޓަރެސްޓުން މިއުކުޅު ސިފަ ކުރަނީ، ސްމޯލް ސްޓިކް ޑިޕްލޮމެސީ ގެ ގޮތުގައެވެ. ޗައިނާގެ ކޯސްޓްގާޑުން ދޭތެރޭން ސަރަހައްދުގެ އެކި ހިސާބު ހިސާބުން ދުއްވާލުން ފިޔަވައި އިތުރަށް ބާރެއް ދައްކާފައެއް ނުވެއެވެ. ނަމަވެސް އަމަލީ ގޮތުން ޗައިނާއިން ވަނީ ދެކުނު ޗައިނާ ކަނޑަށް ބެއިޖިންގެ ސިޔާދަތު އޮތްކަން ދައްކާފައެވެ.
އދގެ ޓްރައިބިއުނަލުން ނިންމާފައިވާ ގޮތުން ފިލިޕީންސްގެ އިގްތިސާދީ ސަރަހައްދުގައި އުޅޭ ޗައިނާގެ އުޅަނދުތަކަކީ އެތަނަށް ގަދަކަމުން ވަދެގެން އުޅޭ އުޅަނދުތަކެކެވެ.
ދަ ނޭޝަނަލް އިންޓަރެސްޓުން ބުނާ ގޮތުން ދެކުނު ޗައިނާ ކަނޑުގައި ޗައިނާއިން ބާރު ދައްކާ ސަރަހައްދުތަކުން ޗައިނާ ފައްސާލުމަށް ބޭނުންވާ ބަޔަކަށް ޖެހޭނީ ބާރުގެ ބޭނުން ކުރާށެވެ. ޗައިނާ އިން ވަނީ މިތަންތާނގައި ޗައިނާގެ މަސްވެރި ބޯޓްތައް ބައިތިއްބާފައެވެ. ސަރަހައްދުގެ ގައުމުތަކުން ސިފަ ކުރާ ގޮތުގައި މިއީ ޗައިނާގެ މިލީޝިއާއެވެ. މި މަސްވެރި އުޅަނދުތައް، ޗައިނާ ސަރުކާރުން ބޭނުންވާ މުއްދަތަކަށް މިތަންތާނގައި އަޅާފައި ތިބޭނެއެވެ.
ހޯލްމްސް ދެކޭ ގޮތުގައި ޗައިނާގެ މަސްވެރި މިލީޝިއާ މި ތަންތަނުން ފައްސާލަން ބޭނުންވާ ބަޔަކަށް ޖެހޭނީ، އެތައް ގައުމެއް ގުޅިގެން ކަނޑުގެ ސިފައިނގެ ލަޝްކަރެއް ތައްޔަރު ކުރާށެވެ.
އެމެރިކާ އަކީ މިހާރުވެސް ދެކުނު ޗައިނާ ކަނޑުގައި މިނިވަންކަމާއެކު އެންމެނަށް ދަތުރުކުރެވޭކަން ސާބިތު ކޮށްދިނުމަށް މަނަވަރުތައް ދުއްވާ ގައުމެވެ. އެމެރިކާއިން ތައްޔާރުވާ ހާލަތެއްގައި، ޖަޕާނާއި އޮސްޓްރޭލިއާއިން ގުޅިދާނެއެވެ. ނަމަވެސް ފިލިޕީންސްގެ ކަނޑުގެ ސިފައިންގެ ކިބައިގައި މިފަދަ ގުޅުމެއްގައި ބައިވެރިވާނެ ހަކަތައެއް ނުހުންނާނެއެވެ. ވިއެޓްނާމަށް ބާރު ދެއްކިދާނެއެވެ. ނަމަވެސް ޗައިނާއާ ދެކޮޅަށް ބާރު ދެއްކޭ ވަރެއް ނުވާނެ ކަމަށް ދަ ނޭޝަނަލް އިންޓަރެސްޓުން ބުނެއެވެ.
މިފަދަ ކުރިމަތި ލުމެއް ހިނގަން ދިމާވެއްޖެނަމަ، ހޯލްސްމް ދެކެނީ ޗައިނާއިން ކުރި ހޯދާނެ ކަމަށެވެ. ބޮޑު ލަޝްކަރެއް ކަމުގައިވިއަސް ޗައިނާއަށް އެބަޔެއްގެ ހިތްވަރު ބަލިކޮށްލެވިދާނެ ކަމަށެވެ.
ދެކުނު ޗައިނާ ކަނޑުގައި ޗައިނާއިން އަސްކަރީ އުކުޅުތައް ގެންގުޅޭނެ ގޮތް ލަފައެއް ނުކުރެވޭނެ އެވެ. ހޯލްސްމްސް ބުނާ ގޮތުން ޗައިނާގެ އަސްކަރީ އުކުޅުތަކަކީ ޗެއަރމަން މާއޯ ގެ ޒަމާނުން ފެށިގެން ގޮތް ދުޝްމަނުންނަށް އެނގޭ އުކުޅުތަކެއް ނޫނެވެ.
ދަ ނޭޝަނަލް އިންޓަރެސްޓް ލަފާ ކުރާގޮތުން މިފަދަ ކުރިމަތި ލުމެއްގައި، ޗައިނާއިން ދިމާކުރާނީ، ދުރުން ލައިގެން ގޮސް ދުޝްމަނުންގެ ލަޝްކަރުގެ ބޭރު އިމަށެވެ. މި ހިސާބަށް މަޑުމަޑުން ހަމަލަތައް އަމާޒުކޮށް، ހޭދައާއި ފުރާނައިގެ ގޮތުން ދުޝްމަންގެ ހިތްވަރު ބަލިކޮށްލާ ވަރަށް ހަމަލަތަކެއް ދޭނީއެވެ. އިންޑިއާގެ ގެލްވާން ވާދީގައިވެސް ޗައިނާއިން ގެންގުޅެނީ މިއުކުޅެވެ.
ހޯލްމްސް ދެކޭ ގޮތުގައި މިފަދަ ހާލަތެއްގައި އެމެރިކާއަށް މި ކުރިމަތިލުން ވެގެންދާނީ ހޭދަ ބޮޑު ހަނގުރާމައަކަށެވެ. މިއީ ޗައިނާއަށް ސީދާ ނަސްރެއްކަމުގައި ނުވިއަސް އެމެރިކާއަށް ވެގެންދާނީ ނާކާމިޔާބީއަކަށެވެ. އެހެންވެ، ދަ ނޭޝަނަލް އިންޓަރެސްޓުން ބުނަނީ، ދެކުނު ޗައިނާ ކަނޑުގައި ޗައިނާއާ ބެހިލުމުގެ ކުރިން ޗައިނާގެ ހަނގުރާމައިގެ އުކުޅުތައް ދިރާސާ ކުރަން ޖެހޭނެ ކަމަށެވެ.
