ކެންޔާއިން ޗައިނާއަށް ދައްކަން ޖެހޭ ލޯނުގެ މައްސަލަ އަނެއްކާވެސް މީޑިއާގެ ސަމާލުކަމަށް އައިސްފިއެވެ. ޔޫކޭގެ ޑެއިލީ މެއިލްގެ ސުރުޚީގައި ސުއާލުކޮށްފައި ވަނީ ޗައިނާއަށް ދަރަނި ނުދެއްކިގެން ކެންޔާގެ މޮމްބާސާ ބަނދަރު ޗައިނާއަށް ނަގައިފާނެ ހެއްޔެވެ؟ ކެންޔާގައި ޗައިނާ އިން ހިންގާފައިވާ ޕްރޮޖެކްޓްތަކަށް، ބެއިޖިންގއަށް ނުވަ ބިލިއަން ޑޮލަރަށް ކެންޔާ ވަނީ ދަރައިފަ އެވެ. ކެންޔާގައި ބެލްޓް އެންޑް ރޯޑް ޕްރޮޖެކްޓްތަކުގެ ދަށުން ބިޔަ ދެ ޕްރޮޖެކްޓެއް ހިންގަމުން ގޮސްފައި ދެއެވެ. އެއީ، އިންޑިއާ ކަނޑަށް އޮންނަ މޮމްބާސާ ސިޓީއިން ވެރިރަށް ނެއިރޯބީއަށް އަޅާފައިވާ ރޭލްވޭގެ ޕްރޮޖެކްޓާއި މޮމްބާސާގެ ވިޔަފާރި ބަނދަރެވެ. 2017ގައި އިފްތިތާޙު ކުރެވުނު ރޭލްވޭ އަކީ ޗައިނާއިން 3.2 ބިލިއަން ޑޮލަރުގެ ލޯނެއް ނަގައިގެން ހަދާފައިވާ ރޭލްވޭ އެކެވެ. ކޮވިޑާ ގުޅިގެން ކެންޔާއަށް ވަނީ ލޯނު ދެއްކުން ދަތިވެފައެވެ.
ކެންޔާގެ ޖުމުލަ ދަރަނި ބޮޑުވެގެން ގޮސް މިހާރު، ބޭރުގެ ދަރަނި ވަނީ 65.3 ބިލިއަން ޑޮލަރަށް އަރާފައެވެ. އަދި ކެންޔާއިން ނަގާ ޓެކްސް ފައިސާގެ 40 އިންސައްތަ ކެންޔާއިން ދަނީ ދަރަނި ދެއްކުމަށް ހޭދަ ކުރަމުންނެވެ. މެރިޓައިމް އެގްޒެކްޓިވް މަޖައްލާއިން ބުނާ ގޮތުން މޮމްބާސާ އިން ކެންޔާއަށް އޮންނަ ރެއިލްވޭގެ ލޯނުގެ ފައިސާ ދެއްކޭގޮތް ނުވުމުން، މޮމްބާސާގެ ބަދަނރު ޗައިނާއަށް ނަގަފާނެ ކަމުގެ ބިރަކީ ހަގީގީ ބިރެއް ކަމަށެވެ.
ކެންޔާގެ ކެބިނެޓް ސެކެޓްރީ އާ ޙަވާލާ ދީ ބުނެފައި ވަނީ ރެއިލްވޭ ޕްރޮޖެކްޓްގެ ކޮލޭޓަރަލް އެއްގެ ގޮތުގައި ޗައިނާއަށް މޮމްބާސާ ބަނދަރު ދީފައި ނުވާނެ ކަމަށެވެ. މޮމްބާސާ ނެއިރޯބީ ރޭލްވޭއަށް ލޯން ހޯދާ ފައި ވަނީ ޗައިނާ އެގްޒިމް ބެންކުންނެވެ. ކެންޔާގެ ކެބިނެޓް ސެކްރެޓެރީގެ ވާހަކައާ ކެންޔާގެ އޮޑިޓަރ ޖެނެރަލްގެ ވާހަކަ ފުށު އަރައެވެ. ކެންޔާގެ އޮޑިޓަރ ޖެނެރަލް ޕާލަމެންޓަށް ހުށަހެޅުއްވި ރިޕޯޓެއްގައި ވިދާޅުވެފައި ވަނީ، ރެއިލްވޭގެ ލޯން ނުދެއްކިއްޖެ ހާލަތެއްގައި، ޗައިނާއަށް ކޮލޭޓަރަލް އެއްގެ ގޮތުގައި މޮމްބާސާ ޕޯޓް ދޭން ސަރުކާރުން އެއްބަސްވެފައިވާ ކަމަށެވެ.
ކެންޔާގެ ލޯން ނުދެއްކުމުގެ މައްސަލައާ ގުޅިގެން ސްޓޭންޑަރ އެންޑް ޕުއަރ އިން ވަނީ ކެންޔާގެ ރޭޓިންވެސް ދަށް ކޮށްފައެވެ. މޮމްބާސާ ޕޯޓަކީ ކެންޔާގެ ސްޓްރެޓިޖިކް އެސެޓްގެ ތެރޭގައި މުހިންމު އެސެޓެކެވެ. މިއީ އަހަރަކު 480 މިލިއަން ރެވެނިއުގެ ގޮތުގައި ލިބޭ ވިޔަފާރިއެކެވެ.
