އީރާންގެ ރައީސްގެ މަގާމަށް އިބްރާހީމް ރައީސީ ހޮވިވަޑައި ގަތުމާ ގުޅިގެން އެމަގާމު ހުސްވުމުން، އުއްތަމަ ފަނޑިޔާރުގެ ނާއިބްގެ މަގާމުގައި ހުންނެވި، ޣުލާމް ޙުސެއިން މުޙިސިނީ އިޖާއީ 64އ.، އެމަގާމަށް މިއަދު އައްޔަން ކުރައްވައިފިއެވެ.
ރޫހާނީ ލީޑަރު އަލީ ޚާމަނައީ ވަނީ، އިޖާއީ އެމަގާމަށް އައްޔަން ކުރެއްވުމަށް ގާރާރެއްވެސް ނެރުއްވާފައެވެ. މިކަމަށް ގިނަ ބަޔަކު ފާޑު ކިޔާފައި ވެއެވެ.
އިޖާއީ އަކީ ރައީސް މުންތަޚަބް ރައީސީއެކޭ އެއްފަދައިން އެމެރިކާއާއި ޔޫރަޕްގެ ޖަމާއަތުން އޭނާއާ ދެކޮޅަށް ދަތިކުރުމުގެ ފިޔަވަޅު އަޅާފައިވާ ބޭފުޅެކެވެ.
އޭނާ އަކީ އީރާންގެ އިސްލާޙީ ޚިޔާލުގެ ދަންނަ ބޭކަލުންނާ ދެކޮޅަށް ޝަރީއަތް ކުރައްވައި އެމީހުން ޖަލަށް ލެއްވި ފަނޑިޔާރެކެވެ. އަދި 2009ގެ މައްސަލަ އުފެދުނު އިންތިޚާބާ ދެކޮޅަށް ނިކުތް މީހުންގެ ޝަރީއަތް ކުރެއްވީވެސް އޭނާއެވެ.
ރައީސް އަޙްމަދީ ނީޖާދުގެ ވެރިކަމުގައި އޭނާ އިންޓެލިޖެންސްގެ ވަޒީރު ކަމުގެ މަގާމުގައި ހުންނަވަނި ކޮށް ނީޖާދު އެމަގަމުން އޭނާ ވަކި ކުރެއްވިއެވެ. އެއަށްފަހު އެއިރުގެ އުއްތަމަ ފަނޑިޔާރު އޭނާ ބަންޑާރަ ނާއިބްގެ މަގާމަށް އައްޔަން ކުރެއްވިއެވެ.
އިދިކޮޅު ފަރާތްތަކުން ބުނާ ގޮތުގައި އިޖާއީ އަކީ މަތީ ފެންވަރުގެ ސިޔާސީ ބޭފުޅުންގެ ޝަރީއަތް ކުރައްވާފައި ހުންނެވި ނަން ހުތުރު ބޭފުޅެއް ކަމަށެވެ.
