އިންޑިއާއިން މައްސަލަ ޖައްސާފައިވާ ސަރަހައްދުތަކުގައި ޕާކިސްތާނުން ޗައިނާގެ މަޝްރޫއުތައް ހިންގަން ނިންމައިފިއެވެ. ޕާކިސްތާނުގައި ޗައިނާއިން ހިންގާ ޕްރޮޖެކްޓްތައް ހިމެނޭ ޗައިނާ ޕާކިސްތާން އިކޮނޮމިކް ކޮރިޑޯ (ސީޕެކް)ގެ ޕްރޮޖެކްޓްތައް ހިންގުމަށް ނިންމާފައި ވަނީ ކަޝްމީރާއި ގިލްގިޓް ބޯލްޓިސްތާންގައެވެ.
މި ދެ ސަރަހައްދުގައި ޗައިނާގެ ޕްރޮޖެކްޓްތައް ހިންގުމަށް ނިންމީ، އަލަށް އެކުލވާފައިވާ ޗައިނާ ޕާކިސްތާންގެ ގުޅުމާ ބެހޭ ކޮމިޓީންނެވެ. މިއީ ދާދިފަހުން، ޕާކިސްތާންގެ ބޮޑު ވަޒީރު، ޗައިނާއިން ޕާކިސްތާންގައި ހިންގާ ޕްޖެކްޓްތަކާ ބެހޭ ގޮތުން ގުޅުން ބަދަހި ކުރުމަށް އެކުލަވައި ލެއްވި ކޮމިޓީއެކެވެ. މިއީ ޕްރޮޖެކްޓްތަކާ ގުޅޭ ގޮތުން ކުރިން ޕާކިސްތާން ފޮރިން މިނިސްޓްރީން ކުރަމުން ގެންދިޔަ މަސައްކަތް ކުރާނެ ކޮމިޓީއެވެ. ޕާކިސްތާންގެ ފޮރިން މިނިސްޓްރީން ބުނެފައި ވަނީ އެ ކޮމިޓީން ސީދާ ޗައިނާއަށް ގުޅައިގެން ކުރިއަށް ގެންދިއުމުގައި މައްސަލައެއް ނެތް ކަމަށެވެ.
އިންޑިއާއިން ބުނާ ގޮތުގައި ހިފައިފައިވާ ސަރަހައްދެއްކަމަށް ބެލެވޭ ބިމެއްގައި ތިން ވަނަ ފަރާތަކަށް އިންވެސްޓްކޮށް ޕޮރޮޖެކްޓްތައް ނުހިންގޭނެއެވެ. ހަމައެފަދައިން ޕާކިސްތާނަށް ގިލްގިޓް ބޯލްޓިސްތާންގައި ޕްރޮޖެކްޓްތައް ހިންގުން މުހިންމު ވަނީ މިއީ ޗައިނާގެ ޝިންޖިއާން ސަރަހައްދާ އިންވެގެންވާ ސަރަހައްދެއް ކަމުންނެވެ.
ޗައިނާއިން ސީޕެކްގެ ދަށުން ޕާކިސްތާންގައި ހިންގާ ގަވަދާރް ޕޯޓާއި، އެޕޯޓްގެ ސަރަހައްދުގައި ހިންގާ ޑިއުޓީ ފްރީ ޒޯންއިން ލައިގެން ޕާކިސްތާނުން ދާ ހައިވޭ ގޮސް ނިމެނީ ޗައިނާގެ ކަޝްގަރަށެވެ. އެހެންވެ، ޗައިނާއަށް ގިލްގިޓް ބޯލްޓިސްތާންގެ ސަރަހައްދުގައި އިންވެސްޓް ކުރަން މުހިންމެވެ.
ގިލްގިޓް ބޯލްޓިސްތާންގެ ސަރަހައްދަކީ ކުރިން ޕާކިސްތާނުގައި ނޯރދަން އޭރިއާގެ ގޮތުގައި މީހުން ދަންނަ ސަރަހައްދެކެވެ. މިއީ އިންޑިއާއިން ބުނާ ގޮތުން ކަޝްމީރުގެ ބައެކެކެވެ.
ޕާކިސްތާނުން ވަނީ ގިލްގިޓް ބޯލްޓިސްތާން ސަރަހައްދެއްކަމަށް ހަދައި ޕާލަމެންޓްގެ ދެގޭގައި އެ ސަރަހައްދަށް ގޮނޑިތައް ކަނޑައެޅުމަށްވެސް ނިންމާފައެވެ.
