ވާދަވެރިކަމުގައި އެއްބަޔަކަށް ވުރެން އަނެއް ބަޔަކު ރަނގަޅު ވުމުގެ ނަތީޖާއަކީ ރައްޔިތު މީހާއަށް ވާ ފައިދާއެވެ. އިންޑިއާގެ ވެރިރަށުގައި މިފަދަ ކަމެއް ކޮވިޑްގައި މަރުވެފައިވާ މީހުންގެ އާއިލާއާ ދިމާވެފައި ވެއެވެ. ނިއުދިއްލީގައި ވެރިކަން ކުރާ ޕާޓީގެ ލީޑަރު ވަނީ ކޮވިޑް19ގައި މައިންބަފައިން މަރުވެފައިވާ ކުދިންނަށާއި އާއިލާތައް އެހީވާން ވެލްފެއަރ ސްކީމެއް ފަށާފައެވެ.
ނިއުދިއްލީއަކީ ޗީފް މިނިސްޓަރ އަރްވިންދު ކޭޖްރިވާލް ވިދާޅުވާ ގޮތުން ކޮވިޑްގެ ހަތަރު ރާޅު ލައިގަތް ސިޓީއެކެވެ. އޭނާ ވިދާޅުވާ ގޮތުގައި ކޮވިޑްގެ ފުރަތަމަ ރާޅު، ޖޫން ގައެވެ. ދެވަނަ ރާޅު ސެޕްޓެމްބަރު އަދި ތިން ވަނަ ރާޅު ނޮވެމްބަރުގައެވެ. ފަހުން އައި ހަތަރު ވަނަ ރާޅަކީ ވަރަށް ގެއްލުން ބޮޑު ގިނަ ބަޔަކު ނެތިގެން ދިޔަ ރާޅެއްކަމުގައި އޭނާ ވިދާޅުވެއެވެ. ކޮވިޑްގެ ތިން ވަނަ ރާޅުގައި ގެއްލުމެއް ނުލިބޭނެ އާއިލާތައް ވަރަށްވެސް މަދުކަމަށް އޭނާ ވިދާޅުވެއެވެ.
މައިންބަފައިން މަރުވެފައިވާ ކުދިންނާއި ފިރިން ނުވަތަ އަނބިން މަރުވެފައިވާ މީހުން، އެމީހުންގެ މީހާ މަރުވެފައިވާ ކަން ލިޔުމުން ސާބިތު ކޮށްދޭނަމަ ސަރުކާރުން އެމީހުންގެ އެކައުންޓަށް ބައި ލައްކަ ރުޕީސް ޖަމާކޮށްދޭނެއެވެ. އަދި އެއަށްފަހު ކޮންމެ މަހަކު 2500 ރުޕީސް އެމީހުންނަށް ޖަމާ ކޮށްދެމުން ދާނެއެވެ. މި ގޮތަށް ޖަމާކޮށްދެނީ ކުދިންގެ އުމުރުން 25 އަހަރު ވަންދެންނެވެ.
މިކަމާ ގުޅިގެން ލިޔެކިޔުން ތައްޔާރު ކުރަން ޖެހޭ ފަރާތްތަކުން އެކަމުގެ އެހީތެރިކަމަށް އެދުމުން ސަރުކާރުން ސޯޝަލް ވޯކަރުން ފޮނުވާނެ ކަމަށް ވެސް އޭނާ ވިދާޅުވިއެވެ.
