ޕާކިސްތާން ސަރުކާރުން އިޒްރޭލް ސަރުކާރާއެކު ގުޅުން ބާއްވާފައިވާ ކަމުގެ މަޢްލޫމާތު ފާއްދާލުމާ ގުޅިގެން އެ މައްސަލަ ތަހްގީގު ކުރުމަށް ޕާކިސްތާންގެ އިދިކޮޅު ލީޑަރު ބިލާވަލް ބުއްޓޫ ގޮވާލައްވައިފިއެވެ.
އިޒްރޭލުގެ ހާއާރޓްސް ނޫހުން ބުނާ ގޮތުގައި އިޒްރޭލާ އެކު ޕާކިސްތާނުން ވަނީ ސިއްރިއްޔާތުގައި ވާހަކަތައް ބާއްވާފައެވެ.
މިމައްސަލާގައި ނަން ކިޔޭ ފަރާތަކީ ޕާކިސްތާންގެ ބޮޑު ވަޒީރު ގެ ޚާއްސަ މުޝީރު ޒުލްފީ ބުޚާރީއެވެ. ޓުއިޓާގައި ބުޚާރީ ވިދާޅުވެފައި ވަނީ އޭނާ އިޒްރޭލަށް ގޮސްފައި ނުވާ ކަމަށެވެ.
އިޒްރޭލުގެ ހާޔޯމް ނޫހުން ބުނާ ގޮތުން ބުޚާރީ ވަނީ 2020ގެ ނޮވެމްބަރުގައި ޓެލްއަވީވަށް ޒިޔާރަތް ކުރައްވާފައެވެ. އަދި މިޒިޔާރަތުގައި އޭނާ ވަނީ ސިފައިންގެ ވެރިޔާ ޖެނެރަލް ގަމަރު ބާޖްވާގެ ޚާއްސަ މެސެޖެއް މޮސާދުގެ ވެރިޔާ ޔޯސީ ކޯހެންއަށް ރައްދު ކުރައްވާފައެވެ.
މިދިޔަ ޑިސެމްބަރުގައިވެސް މި ނޫހުން ރިޕޯޓް ކޮށްފައި ވަނީ ބޮޑު އިސްލާމީ ގައުމެއްގެ އިސް އެޑްވައިޒަރަކު، އިޒްރޭލަށް ޒިޔާރަތް ކުރެއްވި ކަމަށެވެ.
ބިލާވަލް ބުއްޓޫ ވިދާޅުވާ ގޮތުން އިޒްރޭލު ނޫހުން މި ދަތުރު އޮތްކަމަށް ބުނާ މުއްދަތުގައި ޕާކިސްތާންގެ ސިފައިންގެ މަތިންދާބޯޓެއް އައްމާނަށް ދިޔަކަމަށް ވެއެވެ. އޭނާ ވިދާޅުވަނީ އެ ބޯޓެއް އައްމާނަށް ދިޔައީ ކާކު ބަލައި ކަން މިހާރު ސާފުވާ ކަމަށެވެ.
އެމެރިކާއިން އިޒްރޭލާ ޕާކިސްތާނާ އެއްކޮށްގެން އަސްކަރީ ތަމްރީންތައް ބާއްވާފައި ވެއެވެ. އަދި ދެ ގައުމަކީވެސް އެމެރިކާގެ ދެ ބައިވެރިން ކަމުން، އެމެރިކާއިން މި ދެ ގައުމާއެކު ޖާސޫސީ މައްލޫމާތު ހިއްސާ ކުރާ ކަމަށްވެސް ވެއެވެ.
