ޖަޕާނުގެ ބޭންކެއްކަމަށްވާ ސުމިޓޮމޯ މިޓްސުއި އިން އިންޑިއާގެ ބޭންކިންގެ ދާއިރާއަށް ވަންނަން ނިންމައިފިއެވެ. ސުމިޓޮމޯ މިޓްސުއި އިން ނިންމާފައި ވަނީ އިންޑިއާގެ އަމިއްލައަށް ދަރަންޏަށް ފައިސާ ދޭ ކުންފުންޏެއް ގަތުމަށެވެ. ފުލަރޓަން އިންޑިއާ ކްރެޑިޓް ކޮމްޕެނީ ގަތުމަށް ސުމިޓޮމޯ މިޓްސުއި އިން އެއްބަސްވެފައި ވަނީ ދެ ބިލިއަން ޑޮލަރަށެވެ. އެއިރުން ފުލަރޓަންގެ 74.99 އިންސައްތަ ޙިއްސާ މިޓްސުއިއަށް ލިބޭނެއެވެ.
ޖަޕާނުގެ މި ކުންފުނިން ވަނީ މިއަހަރުގެ ތެރޭގައި ވިއެޓްނާމާއި ފިލިޕީންސްގައި ދަރަންޏަށް ފައިސާ ދޭ ކުންފުނިތައް ގަނެފައެވެ. މިޓްސުއިން ބޭނުން ވަނީ އޭޝިއާގެ މާލީ ދާއިރާގައި އިންވެސްޓްކޮށް މިދާއިރާއަށް ވަންނާށެވެ.
1994ގައި މަސައްކަތް ފެށި ފުލާޓަން އަކީ، ބެންކެއް ނޫނެވެ. ނަމަވެސް މިއީ އަމިއްލަ ފަރާތްތަކަށް ލޯނު ދޭ ކުންފުންޏެކެވެ. މި ކުންފުނީގެ މައި ހިއްސާދާރަކީ ސިންގަޕޯރގައި ރެޖިސްޓްރީ ވެފައިވާ ފަރާތެކެވެ.
ފުލާރޓަން އިން ވަނީ 2021ގައިވެސް 3.3 ބިލިއަން ޑޮލަރުގެ ލޯނު ދޫކޮށްފައެވެ. އިންޑިއާގައި 650 ބްރާންޗެއް ހުޅުވާފައިވާ މި ކުންފުނީގައި 14 ހާސް މުވައްޒަފުން މަސައްކަތް ކުރެއެވެ.
