ދުބާއީގެ ޖަބަލު އަލީ ބަނދަރުގައި އޮތް ބޯޓެއްގައި ހުރި ކޮންޓެއިނާތަކެއްގައި ރޯވެއްޖެއެވެ. މި އަލިފާންގަނޑު ރޯވީ ބާރުގަދަ ގޮވުމަކާއެކުގައެވެ.
ސީއެންއެން ބުނާ ގޮތުން 15 ކިލޯ މީޓަރު ދުރަށްވެސް މި ގޮވުން އިހުސާސް ކުރެވިފައި ވެއެވެ.
ޑުބާއީގެ ސިވިލް ޑިފެންސް އިދާރާއިން ބުނަނީ މީހެއްގެ ފުރާނައަށް މިއިން ގެއްލުމެއް ލިބިފައި ނުވާ ކަމަށެވެ. މިގޮވުމުގެ ސަބަބެއް ސާފެއް ނުވެއެވެ.
ދާދި ފަހުންވެސް ދުބާއީއާއި ސައޫދީއާ ދޭތެރޭ ދަތުރުކުރި އިޒްރޭލް ބޯޓެއްގައިވެސް އަލިފާން ރޯވެފައި ވެއެވެ. އެމައްސަލާގައި އީރާނަށް އިޒްރޭލުން ތުހުމަތު ކުރިއެވެ. އަދި ފަހުން އެމެރިކާއިން ވަނީ ގަލްފްގައި ދަތުރުކުރާ އިޒްރޭލް ބޯޓްތަކަށް ސަލާމތީ ގޮތުން ރައްކާތެރި ފިޔަވަޅު އަޅައި ދިނުމަށް ނިންމާފައެވެ.
ޑިއުޓީ ފްރީ ޒޯނަކާއެކު އޮންނަ ޖަބަލު އަލީ އަކީ ދުނިޔޭގެ ނުވަ ވަނައަށް އެންމެ ބޮޑު ބަނދަރެވެ.
