ސިންގަޕޯރގައި ވަޒީފާ އަދާ ކުރުމުގެ ހުއްދަ ދޫކޮށްފައިވާ އިންޑިއާ މީހުންގެ އަދަދު މިދިޔަ އަހަރުގެ 14 އިން ސައްތައިން މިހާރު 25 އިން ސައްތައަށް އިތުރުވެފައިވާ ކަމަސް ސިންގަޕޯރގެ ވަޒީފާއާ ބެހޭ ވަޒީރު ޙާމަކުރައްވައިފިއެވެ.
ޕާލަމެންޓްގައި ވާހަކަ ދައްކަވަމުން އޭނާ ވިދާޅުވީ އިންޑިއާގެ ވަޒީފާ އަދާ ކުރާ މީހުން އިތުރުވެފައި ވަނީ ސިންގަޕޯރގެ ޑިޖިޓަލް އިކޮމިނޮމީކަމަށްވާ ސުމޭކް އިގްތިސާދު ތަރައްގީވެގެން ދިއުމުން ކަމަށެވެ. މިނިސްޓަރ ޓޭން ސީ ލެންގ ވިދާޅުވީ ކޮންމެ ދާއިރާއަކުންވެސް ވަޒީފާ ދޭ މީހުން ބޭނުންވަނީ ހުނަރުވެރި އައިޓީ މީހުން ވަޒީފާއަށް ގެނައުމަށެވެ. އަދި މިވަގުތު ސިންގަޕޯރގައި ސުމޭކް އިގްތިސާދަށް ބޭނުންވާ ވަރަށް އައިޓީގެ ދާއިރާއިން ތަމްރީންވެފައިވާ މީހުން ނެތްކަމަށްވެސް އޭނާ ވިދާޅުވިއެވެ. އެގޮތުން ސިންގަޕޯރގެ އިންފޮމޭޝަން ކޮމިއުނިކޭޝަން ޓެކްނޮލޮޖީގެ ދާއިރާގައި ހަ ހާސް ވަޒީފާއަދިވެސް ހުސްކޮށް އެބައޮތް ކަމަށް އޭނާ މަޢްލޫމާތު ދެއްވިއެވެ.
ސިންގަޕޯރ ވަޒީރު ވިދާޅުވިގޮތުގައި އިންޑިއާ ފިޔަވައި ދެން އޮތީ ޗައިނާއިން އައިޓީ ޕްރޮފެޝަނަލުން ގެނައުމެވެ. ނަމަވެސް ޗައިނާގައި އައު އައިޓީ ކުންފުނިތައް ވުޖޫދަށް އައުމާއެކު ޗައިނާ މީހުން ބޭރަށް ވަޒީފާއަށް އަންނާކަށް ބޭނުމެއް ނުވެއެވެ.
އޭނާ ވިދާޅުވިގޮތުގައި އިންޑިއާ ފިޔަވައި އެހެން ގައުމުތަކުން ސިންގަޕޯރަށް ވަޒީފާއަށް އަންނަ މީހުންގެ އާބާދީ ވަނީ އެއްވަރަކަށް ހިފެހެއްޓިފައެވެ. އެ ގައުމުތަކަކީ، ޗައިނާއާއި އިންޑިއާއާއި ޖަޕާނާއި މެލޭޝިއާއާއި ފިލިޕީންސާއި އިނގިރޭސިވިލާތެވެ.
