އަފްޣާނިސްތާނު ސަރުކާރުން ވަނީ ޕާކިސްތާނުން ތާލިބާނަށް ދެމުންދާ އެހީތެރިކަން ހުއްޓާ ލުމަށް ޕާކިސްތާންގައި އެދިފައެވެ. ކާބުލްއިން އިސްލާމްއާބާދުގައި މިކަމަށް އިލްތިމާސް ކުރަމުން ބުނެފައި ވަނީ މިދިޔަ ވިއްސަކަށް އަހަރު ތެރޭގައި ހޯދާފައިވާ ކާމިޔާބީތައް ތާލިބާނުން ބާރުގަދަ ވުމުގެ ސަބަބުން ގެއްލިގެންދާނެ ކަމަށެވެ.
ތާލިބާން ހަނގުރާމަވެރިން ދަނީ އަފްޣާނިސްތާންގެ ސިފައިން ސަރަހައްދުތަކުން ފައްސާލަމުން އެތަންތަން ހިފަމުންނެވެ. ކާބުލްއިން ބުނާ ގޮތުގައި އެޕްރީލް މަހު އެމެރިކާ ސިފައިން އަފްޣާނިސްތާނުން ފައިބާން ފެށިފަހުން ތާލިބާންގެ ހަމަލާގައި ސިފައިންގެ ހާހަކަށް ވުރެން ގިނަ މީހުން ވަނީ މަރުވެފައެވެ. އަދި މަދަނީންގެ ތިން ހާހަށް ވުރެން ގިނަ މީހުން ވަނީ މަރުވެފައެވެ.
އިންޑިއާގައި ހުންނަވާ އަފްޣާނިސްތާން އެމްބަސެޑަރު، ފަރީދް މާމޫންޒާދީ ވިދާޅުވީ، ޕާކިސްތާންގެ ޕީޝާވަރާއި ކުއެޓާގައި ތާލިބާންގެ ޝޫރާ މަޖިލިސްތައް އޮންނާތީ އެކަމުގެ ކަންބޮޑުވުން ވާނީ އިސްލާމްއާބާދާ ތަކުރާރުކޮށް ޙިއްސާ ކުރެވިފައެވެ.
މާމޫންޒާދީ ވިދާޅުވިގޮތުގައި ތާލިބާނަކީ ޓެރަރިސްޓް ޖަމާއަތެކެވެ. އަދި މިމީހުންނަށް ޕާކިސްތާނުން ތާއީދު ކުރުމުން އެކަމުގެ ގެއްލުން ލިބެމުންދާނީ އަފްޣާނިސްތާނަށާއި ޕާކިސްތާނަށް ކަމަށެވެ.
