އަފްޣާނިސްތާންގައި ތާލިބާނުން ބާރުގަދަ ކުރަމުން ދިއުމާ ގުޅިގެން އެމީހުންގެ ފުށުން ކަޝްމީރުގައި ހަނގުރާމަ ކުރަމުންދާ މީހުންނަށް ހިތްވަރު ލިބިގެންދާނެ ކަމަށް އަސްކަރީ މުހައްލިލުން ވިދާޅުވެއެވެ. ތާލިބާނުން ވަނީ ތާޖިކިސްތާނާއި އިންވެގެން އޮތް ސަރަހައްދުވެސް އެމީހުންގެ ކޮންޓްރޯލްގެ ދަށަށް ގެނަސްފައެވެ. ބޯޑަރު ބަލަހައްޓަމުން ދިޔައ އަފްޣާނިސްތާން ސިފައިން ވަނީ އެމީހުންގެ ޖަގަހަ ދޫކޮށް ފިލާފައެވެ. މިއަދު ތާޖިކިސްތާނުން ވަނީ، ފިލައިގެން ދިޔަ ސިފައިން އަނބުރައި، ކާބުލްއަށް ވައިގެ މަގުން ގެނަސްފައެވެ. މީގެ ތެރޭގައި 300 ސިފައިން ހިމެނެއެވެ.
ނޭޓޯ އާއި އެމެރިކާ ސިފައިން ފައިބައިގެން ދިއުމާ ގުޅިގެން އަފްޣާނިސްތާނުގައި ނުތަވަސްކަން ވަނީ ފެތުރިފައެވެ. ތަފާތު އެތައް ފަރާތަކުން ރިޕޯޓް ކުރާ ގޮތުން އަފްޣާނިސްތާން ދަނީ އަހުލީ ހަނގުރާމައަކާ ދިމާއަށެވެ.
އަސްކަރީ މުހައްލިލުން ބުނާ ގޮތުގައި ތާލިބާނާއި ގުޅޭނީ ޕާކިސްތާނުންނެވެ. އަދި މި ދެފަރާތާ ގުޅޭނެ ފަރާތަކީ ޗައިނާއެވެ. މުހައްލިލުންގެ ލަފާއަކީ، މިތިން ފަރާތް ގުޅޭ އިރު، ނުރައްކާވާނީ، އިންޑިއާއަށް ކަމަށެވެ. އަދި ތާލިބާނުން ބާރު ދައްކާ އިރު، އަފްޣާނިސްތާނު ސަރުކާރަކަށް ދެމިއެއް ނޯވެވޭނެ ކަމަށެވެ.
