ޗައިނާއިން ކަނޑުގެ ދިރާސާތައް ހަދާ އުޅަނދެއް ޕާރަސަލް އައިލެންޑަށް ފޮނުވުމަށް ނިންމުމުން ވިއެޓްނާމުން މައްސަލަ ޖައްސައިފިއެވެ. ޕާރސަލް އައިލެންޑަކީ ދެކުނު ޗައިނާ ކަނޑުގެ ގައުމުތަކުން ހޮންގ ސާގެ ނަމުން ދަންނަ ޖަޒީރާއެކެވެ. ވިއެޓްނާމުން ބުނިގޮތުގައި ޗައިނާއިން ޕާރސަލް އައިލެންޑަށް އުޅަނދު ފޮނުވުމަކީ، ވިއެޓްނާމްގެ ސިޔާދަތާއި އިސްތިގްލާލަށް ބުރޫއަރާ ކަމެކެވެ.
ހެނޯއި އިން ދެކޭ ގޮތުގައި ޗައިނާއިން އެ ޖަޒީރާއަށް އުޅަނދެއް ފޮނުވާ ނަމަ ވިއެޓްނާމްގެ ހުއްދަ ހޯދަން ޖެހޭނެއެވެ. އަދި އެނޫން ގޮތަކަށް ޗައިނާއިން ކަމެއް ކުރާނަމަ އެއީ ގާނޫނާ ޚިލާފް އޭގެ އަސާސެއް ނެތް ކަމެއް ކަމުގައި ވިއެޓްނާމުން ބުނެއެވެ.
ހެނޯއިން ބުނެފައި ވަނީ ތަކުރާރުކޮށް ކުރިންވެސް ބުނެފައިވާނެ ފަދައިން ވިއެޓްނާމަށް ޕާރސަލް އައިލެންޑާއި ސްޕާރޓްލީޒް އައިލެންޑްގެ މައްޗަށް ސިޔާދަތު އޮތްކަން ވާނީ ތާރީޚީ ހެކިތަކާއެކު ދައްކާފައެވެ. އަދި ވިއެޓްނާމުން މިކަން ސާބިތު ކޮށްދެނީ، އދގެ ލޯ އޮފް ދަ ސީ މުއާހަދާއާ އެއްގޮތަށް ކަމަށްވެސް ވިއެޓްނާމުން ބުނެއެވެ.
