ތައިލެންޑްގައި ޗައިނާގެ ކޮވިޑް19 ވެކްސިން ދީފައިވާ ސިއްޙީ ދާއިރާގެ ބަޔަކަށް ކޮވިޑް ޖެހިގެން އެކަން ބޮޑު ވެއްޖެއެވެ. ތައިލެންޑްގެ ހެލްތު މިނިސްޓްރީން ބުނެފައި ވަނީ ފައްސިވެފައިވާ ސިއްޙީ ދާއިރާގެ 600 މީހުންނަކީ، ޗައިނާގެ ސައިނޯވެކް ވެކްސިންގެ ދެޑޯޒް ދީފައިވާ މީހުންނެވެ. އަދި އެފަރާތުން ދަނީ ތިންވަނަ ބޫސްޓާ ޑޯޒެއް ދިމުމާ މެދު ވިސްނަމުންނެވެ.
ތައިލެންޑްގައި ސިއްޙީ ދާއިރާގެ 67،7348 ފަރާތަކަށް ސައިނޯވެކް ވެކްސިންގެ ދެ ޑޯޒް ޖަހާފައި ވެއެވެ. އެޕްރީލް އިން ޖުލައިއަށް ހެލްތު މިނިސްޓްރީން ހާމަ ކުރި ޑޭޓާގައި ބުނެފައި ވަނީ ވެކްސިން ޖެހި 618 މީހަކަށް ކޮވިޑް ޖެހިފައިވާ ކަމަށެވެ. ކޮވިޑް ޖެހިގެން މަރުވެފައި ވަނީ އެންމެ ނަރުހެކެވެ. އަދި އިތުރު އެކަކު ވަނީ އައިސީޔޫގައެވެ. ދެމީހުންވެސް ވަނީ ދެ ޑޯޒް ފުރިހަމަކޮށްފައެވެ.
ތައިލެންޑުން ބުނެފައި ވަނީ ތިން ވަނަ ވެކްސިންއަކަށް ދެން ޖަހާނީ އެސްޓްރާޒެނެކާ ފަދަ ވެކްސީނެކެވެ. އެހެނަމަވެސް މިކަމާ މެދު މުޅިން އަދި ގޮތެއް ނިންމނާފައެއް ނުވެއެވެ.
އާދީއްތަ ދުވަހުވެސް ތައިލެންޑުން ވަނީ ރެކޯޑް އަދަދަކަށް މީހުން ފައްސިވެފައެވެ. ޖުމުލަ 9418 މީހުން ފައްސިވެފައި ވެއެވެ. އަދި 91 މީހަކު މަރުވިއެވެ.
ތައިލެންޑްގައި އެސްޓްރާޒެނެކާވެސް ޖަހާފައި ވެއެވެ. މިހާރު އެގައުމުން ލަފާ ކުރާ ގޮތުގައި މިމަސް ނިމޭއިރު ދޮޅު މިލިއަން ފައިޒާ ވެކްސިން އެމެރިކާއިން ލިބޭނެއެވެ. އަދި އޮކްޓޯބަރުގައި ލިބޭ ގޮތަށް އިތުރު 20 މިލިއަން ޑޯޒްއަށްވެސް ވަނީ އޯޑަރު ދީފައެވެ.
ސައިނޯވެކް ވެކްސިންއަށް ބަރޯސާ ކޮށްފައިވާ އިންޑޮނޭޝިއާ އިން ދަނީ ދިފާއީ ނިޒާމު ވަރުގަދަ ކުރުމުގެ ގޮތުން މޮޑާނާ ވެކްސިންގެ ބޫސްޓާ ޑޯޒްއެއް ޖަހަމުންނެވެ.
