ނޭޕާލަށް ބޭރުން ގެންނަ މުދާ އެހެން ގައުމުތަކުގައި ޓްރާންސިޓްކޮށްފައި ގެނައުމަކީ ބޮޑު ތަކުލީފެކެވެ. މި މައްސަލަ ހައްލު ކުރުމަށް ނޭޕާލުން ޗައިނާއާއެކުވެސް މަޝްވަރާ ކޮށްފައި ވެއެވެ. 2016 ވަނަ އަހަރު ނޭޕާލުން ޗައިނާއާއެކު ސޮއިކޮށްފައި ވަނީ ޓްރާންސިޓް އެންޓް ޓްރާންސްޕޯޓް އެގްރީމެންޓެކެވެ. މި އެއްބަސްވުން އެކުލަވާލަން ޖެހުނީވެސް އިންޑިއާއާ ވީފަޅިން ނޭޕާލަށް މުދާ ލިބުމުގައި ދަތިތައް ކުރިމަތި ވެގެންނެވެ. އިންޑިއާއާއި ނޭޕާލާ ދެމެދުގެ ސަރަހައްދު ބަންދު ކޮށްލުމުގެ ސަބަބުން އިންޑިއާ ފިޔަވައި މުދާ ގެންނާނެ އެހެން ދޮރެއް ހުޅުވަން ނޭޕާލަށް މަޖުބޫރުވީއެވެ.
މި އެއްބަސްވުމަށްފަހު، 2019ގައި ނޭޕާލާއި ޗައިނާއިން ވަނީ މި ޕްރޮޓޮކޯލް ތަންފީޒު ކުރުމުގެ އެއްބަސްވުމެއްގައި ސޮއިކޮށްފައެވެ. މީގެ މާނައަކީ ޗައިނާގެ ބަނދަރުތައް ބޭނުންކޮށްގެން ނޭޕާލުން އެހެން ގައުމުތަކުން ގެންނަ މުދާ ނޭޕާލަށް އެތެރެ ކުރެވޭނެއެވެ.
މި އެއްބަސްވުން ސޮއިކުރެވުނުނަމަވެސް މިއަދާ ހަމައަށް އައި އިރުވެސް ދެ ފަރާތް ދެމެދު އޮޕަރޭޓިންގ ޕްރޮސީޖާއެއް އެކުލަވައި ލެވިފައެއް ނުވެއެވެ.
ނޭޕާލްގެ ކުރީގެ ކޮމާސް އެންޑް އިންޑަސްޓްރީ ސެކްރެޓަރީ ވިދާޅުވީ އަދިއެއްވެސް މުދަލެއް މި އެއްބަސްވުމުގެ ދަށުން ލިބިފައި ނުވާ ކަމަށެވެ. އޭނާ ވިދާޅުވިގޮތުގައި މި އެއްބަސްވުން އެކުލަވާލުމުގެ ބޭނުމަކީ، ދެ ގައުމުގެ ދެމެދު މިފަދަ އެއްބަސްވުމެއް އޮތްކަން އިންޑިއާއަށް ދެއްކުމެވެ.
ނޭޕާލް ޗައިނާގެ ޓްރާންސިޓް އެގްރިމެންޓް ވާނުވާ ނޭގުމެއްގެ ތެރޭގައި ވަނިކޮށް، ނޭޕާލުން ވަނީ ރޭލް ދަތުރުތަކާއި މުދާ އުފުލުމާ ގުޅޭ ގޮތުން ނޭޕާލަށް މުހިންމު އެއްބަސްވުމެއް އިންޑިއާއާއެކު ހަދައި ސޮއިކޮށްފައެވެ. މި އެއްބަސްވުމުގެ ދަށުން ނޭޕާލްގެ މުދާ އުފުލާ ރޭލަށް އިންޑިއާގެ ކަލްކައްތާގެ ޕޯޓާ ހަމައަށް ވަދެގެން ދެވޭނެއެވެ.
