ތައިލޭންޑްގެ ތެލާއި ގޭހުގެ ދާއިރާގެ އެންމެ ބޮޑު ކުންފުނިން އިންޑިއާގައި ބޮޑު އަދަދަކުން އިންވެސްޓް ކުރަން ނިންމައިފިއެވެ. ގްލޯބަލް ޕަވަރ ސައިނާޖީ ޕަބްލިކް ކޮމްޕެނީން ވަނީ އިންޑިއާގެ އިއާދަކުރަނިވި ހަކަތަ އުފައްދާ އަވާޑާ އެނަރޖީގައި 453 މިލިއަން ޑޮލަރު އިންވެސްޓް ކުރަން އެއްބަސްވެފައެވެ.
ގްލޯބަލް ޕަވަރއިން އަމާޒު ހިފާފައި ވަނީ މިހާރު އެކުންފުނިން އުފައްދަމުންދާ 3744 މެގަވޮޓް ކަރަންޓް 8000 މެގަވޮޓަށް އިތުރު ކުރުމަށެވެ. އިންޑިއާއިންވެސް އިއާދަކުރަނިވި ހަކަތަ އުފެއްދުން އިތުރުކުރުމަށް ސަމާލުކަންދީ، ގާނޫނާއި ގަވާއިދުތައް މި ދައިރާގެ ވިޔަފާރިއަށް ފަހިކުރަމުން ދާތީ، މި ކަމުން މިކުންފުންޏަށް ބޮޑު ފައިދާއެއް ކުރާނެ ކަމަށް ބެލެވެއެވެ.
އިންޑިއާގެ އިއާދަ ކުރަނިވި ހަކަތައިގެ ދާއިރާގައި އިންވެސްޓް ކުރުމުން ތައިލެންޑް ކުންފުނިން ކަރބަން ޑައިއޮކްސައިޑް ބޭރުކުރަމުންދާ މިންވަރު މަދުވެގެންވެސް ދާނެއެވެ. އަދި އަވާޑާއިންވެސް ދަނީ 2025އާ ހަމައަށް 11 މިލިއަން މެގަވަޓަށް އިއާދަކުރަނިވި ހަކަތަ އުފެއްދުން އިތުރުކުރުމަށް އަމާޒު ހިފާފައެވެ.
ތައިލެންޑްގެ ހަކަތައިގެ ދާއިރާގެ ބޮޑު ކުންފުނިން މީގެކުރިންވެސް ވަނީ 4726 މެގަވަޓްގެ ހަކަތަ އުފައްދާ ގްލޯ އެނަރޖީ ގެ 69 އިންސައްތަ ޙިއްސާ ގަނެފައެވެ. މި ކުންފުނިން ތައިލެންޑްގައި އިންވެސްޓްކުރުން އިތުރުވެފައިވާތީ، މިއީ ބޭރު ގައުމުތަކުގައި އިންވެސްޓް ކުރުމަށް އެޅި ފިޔަވަޅެކެވެ.
