އިންޑިއާގެ ޚާރިޖީ ވަޒީރު އެސް ޖަޔަޝަންކަރު، ޗައިނާގެ ޚާރިޖީ ވަޒީރު ވެންގ ޔީއާ ބައްދަލު ކުރައްވައިފިއެވެ. މި ދެބޭފުޅުންވެސް ވަޑައިގެން އުޅުއްވަނީ ޝެންހައި ކޯޕަރޭޝަން އޮގަނައިޒޭޝަންގެ ބައްދަލުވުމަށް ދޫޝާންބޭގައެވެ.
ދެ ބޭފުޅުންގެ މަޝްވަރާގައި ޖަޔަޝަންކަރު ވަނީ އެއްވެސް ފަރާތަކުން އަމިއްލައަށް ސަރަހައްދަށް ބަދަލުގެނައުމަށް މަސައްކަތް ކުރުމަކީ ބަލައިގަނެވޭނެ ކަމެއް ނޫން ކަމަށް ވިދާޅުވެފައެވެ. މިއީ އިންޑިއާއާއި ޗައިނާއިން ގެލްވާން ވާދީގައި ކުރިމަތިލާން ފެށިފަހުން ދެ ބޭފުޅުން ޝަޚްޞީ ގޮތަކަށް ބޭއްވެވި ދެވަނަ ބައްދަލުވުމެވެ. ޖަޔަޝަންކަރުގެ ޓުއީޓްގައި ވިދާޅުވެފައި ވަނީ ދެ ބޭފުޅުން އެއް ގަޑިއިރުވަންދެން މަޝްވަރާ ކުރެއްވި ކަމަށެވެ. މަޝްވަރާ ކުރެވުނު ކަންތައްތަކުގެ ތެރޭގައި، ޞުލްޙައާއި ސަރަޙައްދު މަތީގައި ހަމަޖެހުމާއި ދެ ގައުމުގެ ދެމެދުގެ ގުޅުން ހިމެނެއެވެ. އަދި އަސްކަރީ ކޮމާންޑަރުންގެ އިސްވެރިންގެ ފެންވަރުގައި އަވަސް ގޮތަކަށް ބައްދަލުވުން ބެއްވުމުގެ މުހިންމު ކަމުގެ މައްޗަށްވެސް އޭނާ ވާހަކަ ދެއްކެވިއެވެ.
މީގެ ކުރީފަހަރު މި ދެބޭފުޅުން ބައްދަލު ކުރެއްވީ މޮސްކޯގައެވެ.
2020ގެ ޖޫން މަހު ޖަޔަޝަންކަރު، ޗައިނާގެ ޚާރިޖީ ވަޒީރަށް ވިދާޅުވެފައި ވަނީ ގެލްވާންގައި ޗައިނާއިން ހިންގާފައިވާ އަސްކަރީ އުދުވާނަކީ ކުރިއަށް ރާވައިގެން ހިންގާފައިވާ އަމަލެއް ކަމަށެވެ. އަދި ހަމަނުޖެހުން ހިނގަން މެދުވެރިކަމަށްޓަކައި އިންޑިއާގެ ނުރުހުންވެސް ސާފުބަހުން ވިދާޅުވިއެވެ.
ގެލްވާންގެ ހަމަނުޖެހުމުގައި އިންޑިއާ ސިފައިންގެ 20 މީހުން މަރުވިއެވެ. އަދި ޗައިނާގެ ސިފައިންގެ ތެރޭން 43 މީހުން މަރުވިއެވެ. ޗައިނާއިން މަރުވި މީހުންގެ ތެރޭގައި ކޮމާންޑިންގ އޮފިސަރ ވެސް ހިމެނެއެވެ.
މައިދާނުގައި ހަރަކާތްތެރިވާ ސިފައިންގެ ކޮމާންޑަރުން ފެންވަރުގައި ދެގައުމުން ބާއްވާފައިވާ ގުޅުމުންވެސް ކުރިއެރުމެއް ނުލިބެއެވެ.
