ވެންޓިލޭޓަރުތައް ގަތުމުގައި ބޮޑެތި އޮޅުވާލުންތަކެއް ހިންގާފައިވާ ކަމަށް ބުނެ ހެލްތް މިނިސްޓްރީގެ އިސްވެރިންތަކެއްގެ މައްޗަށް ކުރެވޭ ތުހުމަތާ ގުޅިގެން އެންޓި ކޮރަޕްޝަން ކޮމިޝަން (އޭސީސީ) އިން ކޮށްފައިވާ ތަހުޤީޤުގައި ޖިނާއީ ދައުވާއެއްކޮށް، ކުށް ސާބިތުވާ ވަރަށް ހެކި ނެތް ކަމަށް ޕްރޮސެކިއުޓަރ ޖެނެރަލް (ޕީޖީ) ހުސައިން ޝަމީމް މިއަދު ވިދާޅުވެއްޖެއެވެ.
ކޮވިޑް-19 އާ ގުޅިގެން ބޭނުންވާ ވެންޓިލޭޓަރުތައް ހޯދުމުގައި މަގާމުގެ ނުފޫޒު ބޭނުން ކޮށްގެން ދައުލަތަށް ގެއްލުންވާ ގޮތަށް އަމަލު ކޮށްފައިވާ ބުނެ ހެލްތު މިނިސްޓަރު އަބްދުﷲ އަމީންގެ މައްޗަށް ދައުވާ ކޮށްދިނުމަށް އޭސީސީ އިން ޕީޖީ އޮފީހަށް ހުށަހެޅި މައްސަލައިގައި ދައުވާ ނުކުރަން ނިންމާ ކަމަށް ޕީޖީ އޮފީހުން ވަނީ ނިންމާފައެވެ.
ވެންޓިލޭޓަރު މައްސަލައިގައި ދައުވާ ނުކޮށް މައްސަލަ އަނބުރާ ފޮނުވާލެއްވި ސަބަބު ތަފްސީލު ކޮށްދެއްވަމުން މިއަދު ބޭއްވި ނޫސްވެރިންގެ ބައްދަލުވުމުގައި ޕީޖީ ހުސައިން ޝަމީމް ވިދާޅުވީ، މި މައްސަލައިގެ ތަހުޤީޤު ނިންމައި ޕީޖީ އޮފީހަށް ފޮނުވިއިރު، އެއްވެސް މީހެއްގެ މައްޗަށް ޖިނާއީ ދައުވާއެއްކޮށް، ކުށް ސާބިތުވާ ވަރަށް ހެއްކެއް ނެތް ކަމަށެވެ.
ވެންޓިލޭޓަރު މައްސަލައިގައި ހެލްތް މިނިސްޓަރ އަބްދުﷲ އަމީންގެ މައްޗަށް އޭސީސީން 3 ތުހުމަތެއް ކޮށްފައިވާއިރު، އޭގެ ތެރެއިން އެއް ތުހުމަތަކީ ބިޑް ޙަވާލުކުރި މީހާ ކޮމިޓީއަށް ތައާރަފް ކުރެއްވީ މިނިސްޓަރު ކަމަށެވެ. އޭސީސީން މިނިސްޓަރަށް ތުހުމަތު ކުރައްވާފައިވާކަން ފާހަގަ ކުރައްވައި ޕީޖީ ވިދާޅުވީ، މި ކަންކަމަކީ ވަކި މަންފާއެއް ހާސިލު ކުރުމަށް ކޮށްފައިވާ ކަމެއްްކަން ދޭހަވާ ހެއްކެއް ތަހުޤީޤުން ފެންނަން ނެތް ކަމަށެވެ.
ޕީޖީ ވިދާޅުވީ، އިދާރީ ގޮތުން މައްސަލަތަކެއް ފެންނަން ހުރި ކަން ފާހަގަ ކުރެވުނު ނަމަވެސް، ޕީޖީ އޮފީހުން ބަލަނީ ޖިނާއީ ދައުވާއެއް ކޮށް، ސާބިތު ކުރެވިދާނެތޯ ކަމަށާ ވެންޓިލޭޓަރު މައްސަލައިގައި އިދާރީ ގޮތުން ބޮޑެތި ގޯސްތަކެއް ހަދާފައިވާކަން ފެންނަން ހުރި ކަމަށެވެ. އަދި އެންމެ ޒިންމާދާރު ގޮތެއްގައި މިނިސްޓްރީން އަމަލު ކޮށްފައިވޭތޯ ސުވާލު އުފެދޭ ކަންކަންވެސް އެބަހުރި ކަމަށް ޕީޖީ ވިދާޅުވިއެވެ.
ޕީޖީ އިތުރަށް ވިދާޅުވީ، ފައިސާ ދޫކުރުމަށް "ވެންޑަރ" ރަޖިސްޓްރީ ކުރުން ފަދަ އިދާރީ ކަންކަން ކޮށްފައިވާކަމަށް އޭސީސީން ބަޔާން ކުރި ނަމަވެސް، އެއީ މިނިސްޓްރީން ކުރަން ޖެހޭ މަސައްކަތް ކަމަށާއި، އެއީ ކުށެއް ކަމަށް ކޯޓުގައި ސާބިތުވާނެ ކަމަށް ޤަބޫލު ނުކުރެއްވޭ ކަމަށެވެ.
ޕީޖީ ވިދާޅުވީ، "ޕޯސްޓް އޮފީސް" ހިންގާ އުސޫލުން ޕީޖީ އޮފީހަށް ހުށައަޅާ ކޮންމެ މައްސަލައެއް ކޯޓަށް ހުށައެޅުމުގެ ބަދަލުގައި، ޕީޖީ އޮފީހުން ބަލާނީ ތަހުޤީޤާ ގުޅިގެން އެކަށީގެންވާ ހެކި ހުރެ، އޭގެ މައްޗަށް ދައުވާކޮށް، އެ ދައުވާ ސާބިތު ކުރުމަށް ކަމަށެވެ.
އިތުރަށް ޕީީޖީ ވިދާޅުވީ މި މައްސަލައިގެ ތަހުޤީޤާ ގުޅިގެން އޭސީސީއާއެކު މަޝްވަރާތަކެއް ކުރިއަށްދިޔަ ކަމަށާ ނަމަވެސް، އޭސީސީން މައްސަލަ ފަހުން ފޮނުއްވިއިރު ޕީޖީ އޮފީހާ މަޝްވަރާ ކޮށްފައި ނުވާ ކަމަށެވެ.
