މޯލްޑިވްސް މީޑިއާ ކައުންސިލް (އެމްއެމްސީ)އަށް އަމިއްލަ ގޮތުން އިންތިހާބު ވެފައިވާ މެންބަރަކު އިސްތިއުފާ ދެއްވުމުން، އެ މަގާމަށް މީހަކު އިންތިހާބު ކުރުމަށް ހުޅުވާލައިފި އެވެ.
މީޑިއާ ކައުންސިލަށް ކުރިމަތި ލުމުގެ ފުރުސަތު ހުޅުވާލާފައިވަނީ އެ ކައުންސިލްގެ މެމްބަރު ކަމުގެ މަގާމުގައި ހުންނެވި މުހައްމަދު ޔާމީން އިބްރާހިމް އިސްތިއުފާ ދެއްވުމާ ގުޅިގެންނެވެ.
ހޯމް މިނިސްޓްރީން ކުރި އިއުލާނެއްގައި ބުނީ، މެންބަރުކަމުގެ މަގާމަށް ކުރިމަތިލައްވަން އެދޭ ފަރާތްތަކުން، މި މަހުގެ 17 ވަނަ ދުވަހުގެ 13:30އިގެ ކުރިން ފޯމް ހުށަހަޅަން ޖެހޭނެ ކަމަށެވެ.
ވިދިވިދިގެން ދެ ދައުރު އެމްއެމްސީގެ މެންބަރުކަން އަދާ ނުކުރެވޭއިރު، އިންތިހާބު ކުރާ މެންބަރުންގެ ދައުރަކީ ވެސް ދެ އަހަރެވެ.
