ރާއްޖެއިން ބޭރުގައި ހަނގުރާމަ ކުރުމަށް ފަހު އެނބުރި އަންނަ މީހުން ބަންދުކުރަން ކ. ހިންމަފުށީގައި މަރުކަޒެއް ހަދައިފި އެތަނުގައި ފުރަތަމަ ފަހަރަށް މީހަކު ބަންދުކޮށްފި އެވެ.
ހޯމް މިނިސްޓްރީން ބުރާސްފަތި ދުވަހު ނެރުނު އިއުލާނެއްގައި ބުނީ ގާނޫނުގެ ދަށުން އުފައްދަންޖެހޭ ވަގުތީ މަރުކަޒުގެ ގޮތުގައި "ނޭޝަނަލް ރީ އިންޓަގްރޭޝަން ސެންޓަރު" ހިންމަފުށީގައި ގާއިމުކޮށްފައިވާ ކަމަށެވެ.
އެތަނުގައި ބަންދުކުރީ ސީރިއާގެ ދާހިލީ ހަނގުރާމާގައި ބައިވެރިވި ކަމަށް ތުހުމަތުކުރެވޭ 34 އަހަރުގެ މީހެކެވެ. އެމީހާ ރާއްޖެ އައިސްފައިވަނީ މިމަހުގެ 15 ވަނަ ދުވަހުއެވެ. އެ މީހާ ކްރިމިނަލް ކޯޓަށް ހާޒިރުކޮށް ބަންދުގެ މުއްދަތު އިތުރު ކުރުމަށް ފަހު ރީ އިންޓަގްރޭޝަން ސެންޓަރުގައި ބަންދުކުރަން އަމުރުކުރީ 30 ދުވަހުގެ މުއްދަތަށެވެ.
