ތާލިބާނުން އެކުލަވާލާ ވަގުތީ ސަރުކާރުގެ ރައީސަކަށް ހަމަޖައްސާނީ ޢަލީ އަޙުމަދު ޖަލާލީއެވެ. އޭނާއަކީ ސިޔާސީ މައިދާނާއި މީޑިއާގައި އުމުރު ހޭދަ ކުރައްވާފައިވާ ކުރިން ސިފައިންގެ ތެރޭގއިވެސް އުޅުއްވާފައިވާ ބޭފުޅެކެވެ. ސަލާމަތާއި ގުޅޭ ދާއިރާގައި މުހިންމު މަގާމުތައް އޭނާ އަދާ ކުރައްވާފައި ވެއެވެ.
ވޮއިސް އޮފް އެމެރިކާގައި 20 އަހަރު ދުވަސްވަންދެން މަސައްކަތް ކުރެއްވުމުން ގިނަ ބަޔަކަށް އެ ދައުރުން އޭނާ ތައާރަފްވެގެން ގޮސްފައި ވެއެވެ. އޭނާއަކީ އަފްޣާނިސްތާނާއި ދެކުނު އޭޝިއާގެ މައްސަލަތަކުގެ ޚަބީރެކެވެ. ވޮއިސް އޮފް އެމެރިކާގައި އޭނާ މަސައްކަތް ކުރެއްވި އިރު ދިރިއުޅުއްވީ ވޮޝިންޓަނުގައެވެ. އެއީ 1982ން 2003އަށެވެ. އޭނާ އަކީ ޕޮޝްތޫއާއި ދާރީއާއި އުރުދޫ އަދި ފާރިސީބަހަށް ދޫފަރިތަ ބޭފުޅެކެވެ.
1982ން 1993ށް އަފްޣާނިސްތާން ހަނގުރާމައިގައިވެސް އޭނާ ނޫސްވެރިއެއްގެ ގޮތުން މަސައްކަތް ކުރައްވާފައި ވެއެވެ.
2003ން 2005ށް އޭނާ ހޯމް މިނިސްޓަރުގެ މަގާމުވެސް ފުރުއްވާފައި ވެއެވެ. އަދި 2005ން ފެށިގެން އޭނާ މަސައްކަތް ކުރެއްވީ ވޮޝިންޓަންގެ ޔުނިވަރސިޓީއެއްގައި ނިއަރ އީސްޓް ޑިޕާޓްމަންޓްގައި ޕްރޮފެސަރއެއްގެ ގޮތުގައެވެ.
ރޫސީން އަފްޣާނިސްތާން ލޫޓުވާލުމުގެ ކުރިން އަފްޣާން ސިފައިންގެ ތެރޭގައި އޭނާއަކީ ކާނަލް އެކެވެ. ފަހުން މުޖާހިދުންނަށް އަސްކަރީ ސްޓްރެޓެޖީތައް ހެދުމުގައި އޭނާ ވަނީ މަޢުލޫމާތު ދެއްވާފައެވެ.
އޭނާ ކިޔަވައި ވިދާޅުވީ، އަފްޣާނިސްތާނާއި އެމެރިކާއާއި ޔޫކޭއާއި ރޫސީވިލާތުގެ އަސްކަރީ ކޮލެޖްތަކުންނެވެ.
ތާލިބާންގެ ފަހުން އައި ސަރުކާރުގައި ފުލުހުންނާއި ބޯޑަރު ބަލަހައްޓާ ފުލުހުންނާއި މަސްތުވާ ތަކެއްޗާ ދެކޮޅަށް އެކުލާވާފައިވާ ފުލުހުން ތަމްރީން ކުރުމުގައި އޭނާ ބޮޑު ދައުރެއް އަދާ ކުރެއްވިއެވެ.
ޖަލާލީއަކީ ތަކުރީމް ކުރެވިފައިވާ ބޭފުޅެކެވެ. 2005ގައި އަފްޣާނިސްތާނުން ދޭ އެންމެ މަތީ އިއްޒަތް ކަމުގައިވާ ވަޒީރު އަކުބަރު ޚާންގެ އިއްޒަތާއި، 2004ގައި ޚިދުމަތުގެ އިނާމާއި 1968ގައި ސިފައިން އަރުވާފައިވާ އިނާމާއި 1962ގައި އެރުވި އިނާމާއި 1961ގައި ވެސް ސިފައިން އެރުވި އިނާމް ހިމެނެއެވެ.
އެމެރިކާ ސަރުކާރުގައި ވަޒީފާ އަދާކޮށްގެން އެރުވޭ މަތީ އިނާމު 2003ގައި ހޯއްދެވުމުގެ އިތުރުން އެމެރިކާގެ ފެޑެރަލް ސަރުކާރުން 1997އާއި 2003އާއި 2011ގައި އިނާމު އަރުވާފައި ވެއެވެ. ވޮއިސް އޮފް އެމެރިކާއިން 1985ން 1992ށް ޚިދުމަތުގެ އެވޯޑްވެސް ލިބިވަޑައިގެންފައި ވެއެވެ.
ކާބުލްގައި 1940ގައި އުފަންވެވަޑައިގަތް ޖަލާލީއަކީ، އިންޖިނިއަރ ވައިސް ޖަލާލީއާއި ޑރ. ބަޙްރު ޖަލާލީގެ ބައްޕައެވެ. އޭނާ ކައިވެނި ބައްލަވައިގަތީ ހަމީރާ ޖަލާލީއާއެވެ.
