ކްރިސްޓިއާނޯ ރޮނާލްޑޯއަކީ ރެއާލް މެޑްރިޑުގެ ލެޖެންޑެއް ކަމަށާއި އެކަމަކު މިހާރު އޭނާ ރެއާލްއަށް ގެނައުމަށް ޝައުގުވެރި ނުވާކަމަށް އެކްލަބުގެ ކޯޗް ކާލޯ އަންޗެލޮއްޓީ މިއަދު ބުނެފިއެވެ.
މެންޗެސްޓަރ ޔުނައިޓެޑުން އޭރުގެ ދުނިޔޭގެ ރެކޯޑް އަގަކަށް 2009 ވަނަ އަހަރު ރެއާލްއާ ގުޅުނު ރޮނާލްޑޯއަކީ ރެއާލްގެ ތާރިހުގައި އެކްލަބަށް އެންމެ ގިނަ ލަނޑު ކާމިޔާބު ކޮށްދީފައިވާ ކުޅުންތެރިޔާއެވެ. ރެއާލްގައި ރޮނާލްޑޯ ހޭދަކުރި 11 އަހަރު އެކްލަބަށް ކުޅެދިން 292 މެޗުގައި 311 ލަނޑު ކާމިޔާބު ކޮށްދިނެވެ. އަދި އެކްލަބާއެކު ޗެމްޕިއަންސް ލީގް 4 ފަހަރު، ލަލީގާ 2 ފަހަރު، ފީފާ ކްލަބް ވޯލްޑް ކަޕް 3 ފަހަރު، ޔުއެފާ ސްޕަރ ކަޕް 2 ފަހަރު، ސްޕެނިޝް ކޮޕާ ޑެލްރޭ 2 ފަހަރު އަދި ސްޕެނިޝް ސްޕަރ ކަޕް 2 ފަހަރު ކާމިޔާބު ކުރިއެވެ. މީގެ އިތުރުން ރެއާލްގައި ހުރެ ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާގެ މަގާމް 4 ފަހަރު ހާސިލް ކުރިއެވެ.
ރެއާލްއިން ރޮނާލްޑޯ ދޫކޮށްލީ 2018 ވަނަ އަހަރުގެ ޖުލައި މަހު 100 މިލިޔަން ޔޫރޯގެ ޓްރާންސްފާ ފީއެއްގައި އިޓަލީގެ ޔުވެންޓަސްއަށެވެ.
"ރޮނާލްޑޯއަކީ ރެއާލްގެ ލެޖެންޑެއް އަދި އަހަރެން ވަރަށް އިހްތިރާމް ކުރާ ކުޅުންތެރިއެއް. އެކަމަކު މެނޭޖްމަންޓުގައި އަހަރެން ނޭދޭނަން ރޮނާލްޑޯ އަނބުރައި މިކްލަބަށް ގެނެސްދޭކަށް. އަދި އަހަރެން ޕްލޭނެއްވެސް ނުކުރަން މިފަހަރުގެ ޓްރާންސްފާ މާކެޓުގައި ރޮނާލްޑޯގެ ސޮއި ހޯދުމަކަށް" އަންޗަލޮއްޓީ ބުންޏެވެ.
ޔުވެންޓަސްއިން ރޮނާލްޑޯ އެކްލަބަށް ގެނައުމުގެ މައިގަނޑު އަމާޒަކީ ރޮނާލްޑޯގެ ބޭނުން ހިފައިގެން ޗެމްޕިއަންސް ލީގް ތަށި ކާމިޔާބު ކުރުމެވެ. އެކަމަކު ރޮނާލްޑޯއާއެކު ފާއިތުވެދިޔަ ތިން ސީޒަނުގައި ޔުވެންޓަސްއަށް ޗެމްޕިއަންސް ސެމީފައިނަލާ ހިސާބަށްވެސް ދެވިފައެއް ނުވެއެވެ.
