އެމެރިކާގެ މުޅި އާބާދީގައި ހިމެނެނީ 3.45 މިލިއަން މުސްލިމުންނެވެ. މީގެ ތެރެއިންވެސް އެއް ނަސްލަކަށް ނިސްބަތްވާ މުސްލިމުންގެ އެންމެބޮޑު ގްރޫޕްގެ ގޮތުގައި އޮތީ ޕާކިސްތާނު ނަސްލުގެ މުސްލިމުންނެވެ.
އެމެރިކާގެ ޕާކިސްތާނު ނަސްލުގެ މީހުންގެ ތެރޭގައި، އެމެރިކާގައި ޕްރޮފެޝަނަލް އެކިއެކި މަސައްކަތްތައް ކުރާ އެތައްހާސް ބަޔަކުވެސް ހިމެނެއެވެ. އޭގެ ތެރެއިންވެސް، ޑޮކްޓަރުންފަދަ ޚާއްސަ ދާއިރާތަކުގައި މަސައްކަތްކުރާ މީހުންގެ އަދަދު ގިނައެވެ. މިހެންވެ، އެމެރިކާގެ ޕާކިސްތާނު ނަސްލުގެ ރައްޔިތުންނަކީ އެމީހުންގެ އަދަދަށްވުރެ އެމެރިކާގެ މުޖުތަމައުގައި އެމީހުންގެ ނުފޫޒު އެތައްގުނަ ބޮޑު ބައެއްގެ ގޮތުގައި ބެލެވިފައި ވެއެވެ.
އެމެރިކާގެ ރިޔާސީ އިންތިޚާބުގައި ވޯޓްލަމުން ދިއުމާއި، އަދި ކެމްޕެއިންގެ އެންމެ ފޯރިގަދަ ދުވަސްތައް ގުނަމުންދާއިރު، ރައީސް ޑޮނަލްޑް ޓްރަމްޕާއި، އޭނާއާ ވާދަކުރައްވާ ޖޯ ބައިޑެންއާ ދެމެދު ބޮޑެތި އަރާރުންތައް ހިނގަމުންދާ އެއް ކަމަކަށް ޕާކިސްތާނު ނަސްލުގެ މީހުން ހިމެނެއެވެ.
ޖޯ ބައިޑެންގެ ކެމްޕެއިން މެސެޖްތަކެއް އުރުދޫބަހުން ލިޔެ ޝާއިއުކުރި އެމެރިކާގެ 5 ނޫސްވެރިއެއްގެ ވަޒީފާވަނީ ގެއްލިފައެވެ.
މިޒާތުގެ ކަންކަމަށް މީގެކުރީގެ ރިޔާސީ އިންތިޚާބުތަކުގައި މާބޮޑު އަޅާލުމެއް ނުދެއެވެ. އެހެންނަމަވެސް، މިފަހަރު ވާނީ، އެމެރިކާ މިހާތަނަށް ދެކޭނެ އެންމެ ތަފާތު ކަންކަން ހިނގަމުންދާ އިންތިޚާބަށްކަމަށް ވެއެވެ.
ޖޯ ބައިޑެންގެ ކެމްޕެއިން މެސެޖްތަކެއް އުރުދޫބަހުން ލިޔެ ޝާއިއު ކުރުމުން އެކަންވެސް ވެގެންދިޔައީ ބޮޑު މައްސަލައަކަށެވެ. އެއީވެސް، މިފަހަރުގެ އިންތިޚާބުގައި ރައީސް ޓްރަމްޕާއި، ޖޯ ބައިޑެންއާ ދެމެދު ވާދަވެރިކަން އޮތްލެއް ބޮޑުކަމުންނެވެ.
އެމެރިކާގެ ޕާކިސްތާނު ނަސްލުގެ މީހުންނާއި އަދި މުސްލިމުންނަށް އެންމެބޮޑަށް ސަމާލުކަން ހުއްޓިފައިވަނީ އިންތިޚާބުގެ ނަތީޖާއަށް ބަދަލު އަންނާނެ އެންމެ މުހިންމު ސްޓޭޓްތަކުގައެވެ. އެއީ، ސްވިންގް ސްޓޭޓްތަކާއި، ވާދަވެރިކަން އެންމެބޮޑު ސްޓޭޓްތައް ކަމަށްވާ މިޗިގަން، ފްލޮރިޑާ، ވިސްކޮންސިން އަދި ޕެންސިލްވޭނިއާފަދަ ސްޓޭޓްތަކުގައެވެ.
މިހާރުގެ އިދިކޮޅު ޑިމޮކްރޭޓުންނަށް ތާއީދުއޮތް މިޗިގަންއާއި ވިސްކޮންސިން، 2016 ވަނަ އަހަރުގެ ރިޔާސީ އިންތިޚާބުގައި ނޫކުލައިން ރަތްކުލައަށް ވަނީ ބަދަލުވެފައެވެ. މާނައަކީ ވެރިކަންކުރާ ރިޕަބްލިކަން ޕާޓީން އެ ސްޓޭޓްގެ ތާއީދު ނަގާފައިވުމެވެ. އެހެންކަމުން، ޑިމޮކްރޭޓުން ގަދައަޅައި މަސައްކަތް ކުރަމުން ގެންދަނީ އެ ތާއީދު އަނބުރާ ހޯދުމަށެވެ. ޓްރަމްޕް މަސައްކަތް ކުރައްވަނީ އެކަން ވިޔަނުދިނުމަށެވެ.
މިޗިގަންގައި އެކަނިވެސް ވޯޓު ލުމުގެ ހައްގު ލިބިގެންވާ އެއްލައްކައަށްވުރެ ގިނަ މުސްލިމުން އެބަތިއްބެވެ. މުސްލިމުންގެ ތާއީދު ލިބިއްޖެނަމަ އެ ސްޓޭޓް އަނބުރާ ނޫކުލައަށް ބަދަލުކުރުމުގެ ފުރުސަތު ޑިމޮކްރޭޓުންނަށް އެބައޮތެވެ. ވާދަވެރި އެހެން ސްޓޭޓްތަކުގައިވެސް ކަންއޮތީ މިމަގަށެވެ.
އުރުދޫބަހުން ކެމްޕެއިން މެސެޖްތައް ނެރެނީ، ޚާއްސަކޮށް ޕާކިސްތާނު ނަސްލުގެ މީހުންނަށް އަމާޒުކޮށެވެ. ޓްރަމްޕްގެ ކޭމްޕުން ރުޅިއަންނަނީ މިހެންވެގެންނެވެ. އިންތިޚާބުން ޓްރަމްޕް ބަލިވެދާނެ ކަމަށް އެކަން ވެދާނެތީއެވެ.
ޖޯ ބައިޑެން ވިދާޅުވެފައިވަނީ، އެމެރިކާގެ މުސްލިމުންނާއި އަދި ދުނިޔޭގެ އިސްލާމީ ބައެއް ގައުމުތަކާ ދެކޮޅަށް ޓްރަމްޕް އަޅުއްވާފައިވާ ހުރިހާ ފިޔަވަޅުތައް ވެރިކަމުގެ ފުރަތަމަ ދުވަހު އުވާލައްވާނެ ކަމަށެވެ. އަދި އެމެރިކާގެ މުސްލިމުންނަށް އެމީހުންގެ ހައްގު މަގާމު ހޯއްދަވައި ދެއްވާނެ ކަމަށްވެސް ވައުދުވެވަޑައި ގެންފައި ވެއެވެ.
ބުރާސްފަތި ދުވަހު ބޭއްވި އެންމެފަހު ރިޔާސީ ބަހުސްގައި ޖޯ ބައިޑެން ވިދާޅުވެފައިވަނީ، ރައީސް ޑޮނަލްޑް ޓްރަމްޕް، މުސްލިމުން އެމެރިކާއަށް އެރުން "މަނާކުރައްވާފައިވާ" ކަމަށާއި، އެކަން އެގޮތަށް ކުރެއްވީ، އެމީހުންނަކީ ހަމައެކަނި "މުސްލިމުން ކަމުގައިވީތީ" ކަމަށެވެ.
