އެމެރިކާއިން އަފްޣާނިސްތާނަށް އަރައިގަތީ 2001ގައެވެ. އެއިރު ދުނިޔޭގެ އިގްތިސާދު އޮތީ މިހާރު އޮތް ގޮތާ ވަރަށްވެސް ތަފާތު ގޮތަކަށެވެ. އެއިރު ސާދާގަރު އިލޯން މަސްކުގެ ޓެސްލާ ކުންފުންޏެއްވެސް ވުޖޫދަކު ނެތެވެ. އައިފޯނެއްވެސް ނެތެވެ. މަސްނޫއީ ސިކުނޑި ނުވަތަ އާރޓިފިޝަލް އިންޓެލިޖެންސަކީވެސް ސްޓީވެން ސްޕިލްބަރގްގެ ފިލްމެއްފަދަ ވާހަކައެކެވެ.
މިހާރު ޒަމާން ބަދަލުވެއްޖެއެވެ. ޓެކްނޮލޮޖީގައި މި ތިން އުފެއްދުމަކީވެސް ޒަމާނީ އިގްތިސާދުގެ ނާރެހެވެ. ހައިޓެކް ޗިޕްއަށާއި ގިނަ އިރު ހިފަހައްޓާލާ ވަރުގެ ބާރުގަދަ ބެޓެރިއަށް ދުނިޔެ މިވަނީ ފެން ބޮވައިގެންފައެވެ. މިއިން ކޮންމެ އުފެއްދުމެއްގައިވެސް ދުނިޔޭގެ ބިމުން ނަގާ ނާދިރު މައުދަންތައް ހިމެނެއެވެ.
އަފްޣާނިސްތާނަކީ، އެއް ޓްރީލިއަން ޑޮލަރަށް ވުރެން ގިނަ ނާދިރު މައުދަން އެތަނެއްގައި ވަޅުލެވިފައިވާ ގައުމެކެވެ. މި މައުދަންތައް ނަގައި ދެނީ ކާކު ހެއްޔެވެ؟
ސާޅީސް އަހަރު ވަންދެން ހިނގަމުންދާ ގަބީލާ ހަނގުރާމަތަކަށް ނިމުމެއް ނެތެވެ. ތާލިބާނުން ދަނީ މެދުމިނުގެ ހަމަތަކެއް ގެންގުޅޭ ކަމަށް ދައްކަމުންނެވެ. ތާލިބާން ލީޑަރު އެއް ލޯ މުއްލާ އުމަރު ދުށް ގޮތާ ޚިލާފަށް ބަދަލުވެފައިވާ ތާލިބާނުން މުޝްރިކުންނަކީ ނަޖިސް ބަޔެއްގެ ގޮތުގައި ބަލާ ބަޔެއް ނޫނެވެ. މުޝްރިކުންނާ އެއް މޭޒަކަށް އަރައި ވާހަކަ ދައްކައި ސަލާންގަލާން ކުރުންވެސް މިހާރުގެ ތާލިބާނަށް އޯކޭއެވެ.
"އެމެރިކާ ސިފައިން ފައިބައިގެން ދިއުމުން، ވަކިއަތަކަށް ނުޖެހޭ ތާއީދާއި އިގްތިސާދު ކޮއްޅަށް ޖެހުމަށް ބޭނުންވާ އިންވެސްޓްމެންޓް ޗައިނާއަށް ދެވިދާނެ" ނިއު ޔޯރކް ޓައިމްސްގައި ޗައިނާގެ ސިފައިންގެ ރިޓަރޔަރޑް ކާނަލް ޒޯއޯ ބާއޯ ލިޔުއްވިއެވެ. "ބަދަލުގައި އަފްޣާނިސްތާނުން ދޭންވީ ޗައިނާއަށް ކޮންސްޓްރަކްޝަންގެ ފުރުސަތުތަކާއި ސިނާއީ ދާއިރާ ބިނާކުރުމުގެ މަސައްކަތް. އަދި އަފްޣާނިސްތާންގެ ފަސްގަނޑުގައިވާ އެއް ޓްރީލިއަން ޑޮލަރުގެ މައުދަން ނެގުމުގެ މަސައްކަތްވެސް ހަވާލު ކޮށްދޭންވީ" އޭނާ ލިޔުއްވިއެވެ.
އަފްޣާނިސްތާންގައި ކުރިއަށް ވާން ހުރި ކަންކަން ސާފުވާނީ އެމެރިކާ މީހުން އަފްޣާނިސްތާނުން އެއްކޮށް ފޭބުމުންނެވެ. އެއަށްފަހު އެމެރިކާގެ ރައީސްގެ އަތްޕުޅުގައި އަފްޣާނިސްތާނަށް ދަތިކުރުމަށް ކުރެވިދާނެ ކިތަންމެ ކަމެއް އެބަހުއްޓެވެ. ކުންފުނިތަކުން އަފްޣާނިސްތާންގައި ވިޔަފާރި ނުކުރެވޭ ގޮތް ހެދުމާއި އިގްތިސާދީ ދަތިކުރުމުގެ ފިޔަވަޅުތައް އެޅުމަކީވެސް އޮތް ކަންތައްތަކެވެ.
ޖީ 7ގެ ގައުމުތަކުން ބުނެފައި ވަނީ އަފްޣާނިސްތާންގެ ސަރުކާރަށް ގާނޫނީ ހައިސިއްޔަތެއް ލިބޭނީ، އަފްޣާނިސްތާނުން އެއްބަސްވެފައިވާ ބައިނަލްއަގްވާމީ އިލްތިޒާމްތަކަށް އެގައުމުން އިޙުތިރާމް ކުރާ މިންވަރަށް ބަލާފައެވެ.
ޗައިނާގެ ގްލޯބަލް ޓައިމްސްގައި ބުނެފައި ވަނީ އަފްޣާނިސްތާނުން ނާދިރު މައުދަންތައް ނެގުމަށް ޗައިނާއިން އަފްޣާނިސްތާނާ ގުޅިގެން މަސައްކަތް ކުރަނީ ނަމަ އެކަމަށް ހުރަސްއެޅުމަށް އެމެރިކާއަށް ކުރެވޭނެ ކަމެއް ނޯންނާނެއެވެ. (ބްލޫމްބަރގް)
