ޗައިނާގެ މުސްލިމުންގެ ޒާތީ މިނިވަން ސަރަހައްދު ޝިންޖިއާންގެ އިސް ވިޔަފާރިވެރިއަކު ޝިންޖިއާންގައި ބަންދުކޮށް ހުރަގެއަށް ލައިގެން އުޅޭ ކަމަށް ރޭޑިއޯ ފްރީ އޭޝިއާއިން ބުނެފިއެވެ.
މެހްމޫދުޖާން މުހައްމަދުޖާންއަކީ އުމުރުން 35 އަހަރުގެ މީހެކެވެ. އޭނާއަކީ ކަޝްގަރުގައި ކޮންސްޓްރަކްޝަން މަސައްކަތުގައި އުޅޭ ތަންތަން ކުއްޔަށް ދިނުމާއި އެޕާޓްމެންޓްތައް ވިއްކައި ކުއްޔަށް ދީ އުޅޭ މީހެކެވެ.
ޗައިނާ ސިފައިން އޭނާ ހައްޔަރުކޮށް ހުރަގެއަށް ލައިފައި ވަނީ 2017ގައި އޭނާގެ އޮފީހުން އޭނާ އުފުރާލައިގެން ގެންގޮހެވެ. މިކަން އޭނާގެ ރަޙުމަތްތެރިން ކަށަވަރުކޮށްދެއެވެ. މިހާތަނަށްވެސް އޭނާގެ ޚަބަރެއް ވެފައި ނުވާކަމަށް އޭނާގެ ގާތް މީހުން ބުނެއެވެ.
ރޭޑިއޯ ފްރީ އޭޝިއާ އިން ބުނިގޮތުގައި ޗައިނާ ފުލުހުން އޭނާ ގެންދިޔައީ، އެމެރިކާއަށް 2016ގެ އެޕްރީލް 8ން 22ށް ދަތުރެއް ކޮށްފައި އައި ފަހުންނެވެ. މި ދަތުރުގައި އޭނާގެ އަންހެނުން ދަރިއަކު ވިހައެވެ. އަދި އެ ކުއްޖާ އެމެރިކާގައި އުފަން ވުމުން އޭނާއަށް އެމެރިކާ ޕާސްޕޯޓެއް ލިބުނެވެ.
މުހައްމަދު ޖާންއަކީ ޗައިނާއިން ހައްޔަރުކޮށްގެން އުޅޭ މުސްލިމު 1.8 މިލިއަން މީހުންގެ ތެރޭން އެކަކެވެ. ޗައިނާއިން އިސްލާހިއްޔާތަކެއް ހަދައިގެން މުސްލިމުންނަށް ޗައިނާ ވަންތަކަން ދަސްކޮށް ދިނުމަށް ކޭމްޕްތައް ހިންގާ ކަމަށް ބުނިނަމަވެސް އެތާގައި މަސައްކަތް ކޮށްފައިވާ މީހުންނާއި އެތަނުން މިނިވަންވި މީހުން ބުނާ ގޮތުން މިއީ މީހުންނަށް އަނިޔާ ކުރުމަށް ހަދާފައިވާ ހުރަގެތަކެކެވެ.
ދުނިޔޭގެ އެތައް ގައުމަކުން ވަނީ ޗައިނާގެ އަނިޔާވެރި އަމަލުތައް މިއީ ނަސްލުތައް ނެތިކޮށްލުމުގެ އަމަލުތަކެއް ކަމަށް ސިފަ ކޮށް މިކަން ކުށްވެރި ކޮށްފައެވެ.
