ތާލިބާނުން އައިސް ޕާކިސްތާނާ ގުޅިގެން ކަޝްމީރު މިނިވަން ކުރަން މަސައްކަތް ކުރާނެ ކަމުގައި ޕާކިސްތާންގެ ސަރުކާރު ހިންގާ ޕާޓީގެ ލީޑަރު ވިދާޅުވެއެވެ. ތަޙްރީކޭ އިންސާފް ޕާޓީގެ ލީޑަރު ނީލަމް އިރްޝާދު ޝެއިޚް ވިދާޅުވީ، ދުނިޔޭގެ ހުރިހައި ހިސާބެއްގައި ޕާކިސްތާންގެ އިއްޒަތު ދަނީ އިތުރު ވަމުންނެވެ. އަދި ދުނިޔޭގެ ހުރިހައި ހިސާބެއްގައިވެސް އެންމެ ބަސްވިކޭ ލީޑަރަކީ ޕާކިސްތާންގެ ބޮޑު ވަޒިރު އިމްރާން ޚާނެވެ.
ނީލަމްގެ ވާހަކައަށް ޕާކިސްތާން މުސްލިމް ލީގް (ނ)ގެ މެމްބަރުވެސް އަދި ޕްރޮގްރާމު ހުށަހަޅަން އިން ފަރާތުންވެސް މަލާމާތް ރައްދު ކުރިއެވެ. ނަމަވެސް ތަކުރާރުކޮށް ނީލަމް ވިދާޅުވީ ތާލިބާނަކީ ނިކަމެތި ކުރެވިފައިވާ ބައެއް ކަމަށެވެ. އަދި ތާލިބާނޖު ހަނގުރާމަވެރިން ޕާކިސްތާނާ ގުޅިގެން "އިންޑިއާގެ އަތްދަށުން ކަޝްމީރު ފަތަޙަ ކޮށްދޭން އަންނާނެ" ކަމަށެވެ.
ޕާކިސްތާންގައި ތާލިބާނުންގެ ކާމިޔާބީއަށް ސަރުކާރު މަސްއޫލުވެރިންނާއި ސިޔާސީ ފަރާތްތަކާއި ދީނީ ލީޑަރުން ދަނީ އުފާ ފާޅު ކުރަމުންނެވެ.
ތާލިބާނުން ދަމނީ މެދުމިނުގެ ސޫރައެއް ދެއްކުމަށް މަސައްކަތް ކުރަމުންނެވެ. އިންޑިއާ މީހުން އަފްޣާނިސްތާނުން ބޭރު ނުކުރުމަށާއި އަދި އިންޑިއާ މީހުންނަށް ހިމާޔަތް ދޭނެ ކަމަށާއި ކާބުލްގައި ހުންނަ އިންޑިއާ އެމްބަސީ ހުސްނުކުރުމަށްވެސް ތާލިބާނުން ވަނީ އިންޑިއާއަށް އާދޭސް ކޮށްފައެވެ. ތާލިބާނުން އެދިފައި ވަނީ އިންޑިއާ މީހުން އަފްޣާނިސްތާންގައި އަމާން ކަމާއެކު ތިބެގެން އަފްޣާނިސްތާންގައި ހިންގަން ފަށާފައިވާ ޕްރޮޖެކްޓްތައް ނިންމައި ދިނުމަށެވެ.
