ކާބުލްގެ އެއަރޕޯޓަށް އެތެރެވާ މައި ދޮރާށި ކައިރީގައި ދީފައި ދެ ހަމަލައެއްގައި އެތައް ބަޔަކު މަރުވެއްޖެއެވެ. އެމެރިކާ ސިފައިންގެ ބަޔަކުވެސް މަރުވިކަމަށް އެމެރިކާގެ ދިފާއީ ވުޒާރާއިން ވަނީ ކަށަވަރު ކޮށްދީފައެވެ.
އެމެރިކާ މަސްއޫލުވެރިންނާ ޙަވާލާދީ އެތައް މީޑއާއަކުން ރިޕޯޓް ކޮށްފައިވާ ގޮތުގައި މި ޙަމަލަ ދީފައި ވަނީ އައިސިސް ޚުރާސާން ޖަމާއަތުގެ މީހުންނެވެ. މިއަދު ހެނދުނުން ފެށިގެން މިފަދަ ޙަމަލައެއް އެއަރޕޯޓަށް ދޭން އުޅޭ ކަމަށް ޖާސޫސީ ރިޕޯޓްތައް ބުނެފައި ވެއެވެ.
މިހާތަނަށް ލިބޭ މަޢުލޫމާތު ބުނާ ގޮތުން ފުރަތަމަ ހަމަލައަކީ އައިސިސް ޚުރާސާންގެ މީހަކު ގައިގައި ގޮވާތަކެތި ބަނދެގެން ޖާނު ގޮއްވާލައިގެން ދީފައިވާ ޙަމަލާއެވެ.
ތުރުކީ ނޫސް އެޖެންސީ ބުނާ ގޮތުން ޙަމަލާގައި ހަ މީހަކު މަރުވިއެވެ. އަދި 60 މީހަކަށް ހާނީއްކަވެފައި ވެއެވެ.
ފަރަންސޭސިވިލާތުގެ ރައީސް ދާދި ދެންމެއަކު ވިދާޅުވެފައި ވަނީ ކާބުލް އެއަރޕޯޓްގައި ޙާލަތު ވަރަށްވެސް ނާޒުކު ކަމަށެވެ.
އިންގިރޭސި ބޮޑު ވަޒީރުގެ އޮފީހުން އިޢުލާން ކޮށްފައި ވަނީ ދާދި އަވަހަށް އަފްޣާނިސްތާންގެ ހާލަތާ ބެހޭ ގޮތުން ބޮރިން ޖޯންސަން ކެބިނެޓްގެ ބައްދަލުވުމެއް ބާއްވާނެ ކަމަށެވެ.
