އައިސިސްއިން ކާބުލް އެއަރޕޯޓަށް ދީފައިވާ މެސެޖަކީ ތާލިބާނުން އެމެރިކާއާއެކު ސުލްޙައަށް ދިޔަނަމަވެސް އައިސިސްގެ ހަރުކަށި ކަމަށް ލުޔެއް ދިނުމެއް ނެތް ކަމަށެވެ.
އައިސިސްއަކީ ސުންނީ ޖަމާއަތަކެވެ. ސުންނީ ތާލިބާނާއެކު އަގީދާގެ ގޮތުންނާއި ސިޔާސީ ގޮތުން އެއް ފިކުރެއް ޙިއްސާ ކުރާ ބަޔެކެވެ. ހަމައެކަނި ތަފާތަކީ، ތާލިބާނުންނަކީ ނަސްލީ ގޮތުން ޕުޝްތޫ ބަޔަކަށް ވެފައި އައިސިސްއަކީ އެތައް ގައުމިއްޔަތެއް އޭގައި ހިމެނޭ ބަޔެއް ކަމެވެ.
ކާބުލް އެއަރޕޯޓަށް ދިން ހަމަލާގައި 150 އަފްޣާން މަދަނީން މަރުވިއެވެ. އެމެރިކާ ސިފައިންގެ 13 މީހުންވެސް މަރުވިއެވެ.
ކާބުލް އެއަރޕޯޓަށް ހަމަލަ ދީފައި ވަނީ އައިސިސްގެ ޚުރާސާން ގޮތްޕެވެ. އައިސިސް ޚުރާސާން އަކީ ޕާކިސްތާނާއި އަފްޣާނިސްތާންގައިކ އޮޕަރޭޓް ކުރާ ޓެރަރިސްޓް ޖަމާއަތެކެވެ.
ޚުރާސާން އަކީ އަފްޣާނިސްތާނާއި މެދު އިރުމަތީގެ ބައެއް ސަރަހައްދު ހިމަނައިގެން އިސްލޅާމީ ޚިލާފަތު ހިންގި ސަރަހައްދަކަށް ކިޔާ ގަދީމީ ނަމެކެވެ.
މުހައްލިލުން ބުނާ ގޮތުގައި އައިސިސް ޚުރާސާންގައި ހިމެނެނީ ހިތްހަމަނުޖެހިފައިވާ ޕާކިސްތާނާއި އަފްޣާން ތާލިބާން ޖަމާއަތުގެ މީހުންނެވެ.
2014ގައި އުފެދުނު މި ޖަމާއަތުން ވަނީ އައިސިސްގެ ލީޑަރު އަބޫބަކުރު ބަޣްދާދީއަށް ބައިއަތު ހިފާފައެވެ.
ތާލިބާނާއި އައިސް އިން ޚިޔާލު ތަފާތު ކަންތައްތަކެއްވެސް ހުރެއެވެ. މި ދެ ޖަމާއަތުން ޚިޔާލު ތަފާތު ވަނީ ތާލިބާނުން ޕުޝްތޫ ނަސްލަށް އިސްކަން ދޭތީއެވެ. ދެ ޖަމާއަތުންވެސް ބޭނުން ވަނީ އަފްޣާނިސްތާންގެ ރިސޯސްތައް މިމީހުންގެ އަތަށް އެރުމެވެ. އެހެންވެ ދެ ބައި މީހުންގެ ދެމެދުގައި ވާދަވެރިކަމެއް އެ ބައޮތެވެ.
