އަފްޣާނިސްތާންގެ ޝަރުއީ ވެރިއަކީ، ނާއިބް ރައީސް އަމްރުﷲ ސާލިޙުކަމަށް އެމެރިކާއިން ބަލައި ގަތުމަށް ސަރުކާރަށް އެމެރިކާގެ ކޮންގްރެސްގެ މެމްބަރުން ގޮވާލައިފިއެވެ. ޔޫއެސް ސެނެޓްގެ ރިޕަބްލިކަން ލީޑަރ ސެނެޓަރ ލިންޑްސޭ ގްރަހަމް އާއި ކޮންގްރެސް މެމްބަރު މައިކް ވޯލްޓްޒް ވިދާޅު ވަނީ އަފްޣާނިސްތާންގެ ގާނޫނުއަސާސީ އުވާލާފައި ނުވާ ކަމަށެވެ. އަދި މި ގާނޫނުއަސާސީއަށް އަމަލު ކުރަމުންދާތީ، ގައުމުގައި ހުންނެވި ނާއިބް ރައީސަކީ ސަރުކާރުގެ ޝަރުޢީ ވެރިޔާކަމުގައި އެމެރިކާއިން ބަލައިގަންނަން ޖެހޭނެ ކަމަށެވެ. އަދި ތާލިބާނުން ކާބުލްގައި ވެރިކަން ހިފާފައި ވަނީ ގާނޫނާ ޚިލާފަށް ކަމަށްވެސް އެމެރިކާއިން ނިންމުމަށް އެދިފައި ވެއެވެ.
މި ދެ މެމްބަރުން އެދިވަޑައިގެންފައިވަނީ ތާލިބާނަކީ ޓެރަރިސްޓް ޖަމާއަތެއްކަމަށް އެމެރިކާގެ ރައީސް އިޢުލާން ކުރެއްވުމަށާއި، ޕަންޖްޝޭރް ވާދީގައި ތާލިބާނާ ދެކޮޅަށް ހަނގުރާމަ ކުރާ އަޙްމަދު މަސްއޫދާއި އަމްރުﷲ ސާލީހުއަށް އެމރިކާއިން އެހީވެ ދިނުމަށެވެ.
ސެނެޓަރުން ސިފަ ކުރެއްވި ގޮތުގައި މި ދެ ބޭފުޅުންނަކީ އެމެރިކާގެ ރަޙުމަތްތެރިންނެވެ.
