ކަޝްމީރުގައި އަމިއްލައަށް މަރުވުމުގެ ހާދިސާތައް ގިނަކަމުން، މީހުން ހޭލުންތެރި ކުރުމުގެ ގޮތުން މިއުޒިކަލް ކޮނަސަރޓެއް އިއްޔެ ބާއްވައިފިއެވެ. "ނަޔާ ކަޝްމީރު- ސްޓޮޕް ސުއިސައިޑް"ގެ ނަމުން ބާއްވާފައިވާ މި މިއުޒިކަލްގައި ކަޝްމީރުގެ ލަވައާއި ބޮލީވުޑްގެ ލަވަތައް ކިޔާފައި ވެއެވެ.
ޒުވާނުންގެ ބަޔަކު އިސްނަގައިގެން ބާއްވާފައިވާ މި ކޮންސެޓް އިންތިޒާމު ކުރުމުގައި އިސްވެ ހުރި ފަރާތް ކަމަށްވާ ސިމްރަން ޖާން އާއި ސުހައިލް ސައްޔިދު ކިޔައިދިން ގޮތުގައި މި ކޮންސެޓްގެ މަގްސަދަކީ މީހުންނަށް ލަވަތައް އިއްވައި، މީހުންގެ ބައިވެރިވުން ހޯދައި، ދޭތެރޭން ސުއިސައިޑްގެ ނުރައްކަލާއި އަދި އޭގެ ވަސްވާހުން ސަލާމަތްވާނެ ގޮތް މީހުން ޝައުގުވެރިވާ ގޮތަށް ކިޔައިދިނުން ކަމަށެވެ.
މި ކޮންސެޓް އިންތިޒާމު ކުރި މީހުން ގޮވާލާފައި ވަނީ ޒުވާނުން މިފަދަ ކަމެއް ކުރުމުގެ ކުރިން އާއިލާއާއި އަމިއްލަ ނަފްސާ މެދު ވިސްނުމަށް އެދިފައެވެ.
ކަޝްމީރުގައި މާޔޫސްވެފައިވާ ޒުވާނުންނަށް ފުރުސަތުތައް ފަހިކޮށް ދިނުމުގެ ގޮތުން ސަރުކާރުން ވަނީ އިންވެސްޓްމެންޓް ސްކީމްތަކާއި ވިޔަފާރި ފެށުމަށް ބޭނުންވާ ފަރާތްތަކަށް މާލީ އެހީތެރިކަން ދިނުމާއި ހުނަރު ދަސްކޮށް ދިނުމުގެ މަސައްކަތްތަކެއް ފަށާފައެވެ.
ޒުވާނުންނަށް ފަށާފައިވާ މިފަދަ ސްކީމްތަކުގެ ސަބަބުން މަގުތަކަށް ނިކުމެ އޮށްގާ އުކާ މީހުންގެ އަދަދު މިހާރު ވަނީ މަދުވެފައެވެ.
