ބަޙުރައިން ސަރުކާރާއި ކޮލޮމްބިއާ ޔުނިވަރސިޓީއާއި ގުޅިގެން ހަދާފައިވާ ދިރާސާއެއްގައި ބުނެފައި ވަނީ ޗައިނާއިން އުފައްދާފައިވާ ސައިނޯފާމް ވެކްސިންއަކީ އުމުރުން 50 އަހަރުން މަތީގެ މީހުން ކޮރޯނާ ވައިރަސްއިން ހަސްފަތާލުގައި އެނދުމަތި ކުރުމާއި މަރުން ސަލާމަތް ކޮށްދިނުމުގައި މާބޮޑު ދިފާއީ ބާރެއް ހުންނަ ވެންސިނެއް ނޫން ކަމަށެވެ. މިވާހަކަ ރިޕޯޓް ކޮށްފައި ވަނީ ވޯލްސްޓްރީޓް ޖަރނަލްއިންނެވެ.
ބަހުރައިންގައި ވަނީ ގނަ އަދަދަކަށް ސައިނޯފާމް ވެކްސިން ޖަހާފައެވެ. ނަމަވެސް ބަލި ކޮންޓްރޯލް ނުވުމުގެ ސަބަބުން ބަހުރައިން އިން ވަނީ ފައިޒަރއާއި އެހެން ޔޫރަޕިއަން ވެކްސިންތައް ބޭނުންކޮށްގެން ބޫސްޓާ ޑޯޒެއް ދޭން ފަށާފައެވެ.
މި ހަފްތާގައި ޝާއިއުކޮށްފައިވާ ދިރާސާގައި ބުނެފައި ވަނީ އިންޑިއާގެ ކޮވިޝީލްޑާއި ރަޝިޔާގެ ސްޕްޓްނިކްވެސް ކޮވިޑް19އިން ދިފާއުވުމަށް ހަރުދަނާ ރޯލެއް ކުޅެދޭ ކަމަށެވެ.
މިދިރާސާއިން ވަނީ އެކިއެކި ވެކްސިން ޖަހާފައިވާ މީހުން ކޮވިޑްޖެހިގެން މަރުވާ ނިސްބަތުގެ ތަފާސްހިސާބެއްވެސް ދީފައެވެ. ސައިނޯފާމް ޖަހާފައިވާ މީހުން މަރުވާ ނިސްބަތް އުޅެނީ 0.46 އިންސައްތައިގައެވެ. ފައިޒަރ ޖަހާ މީހުން މަރުވާ ނިސްބަތް އުޅެނީ 0.15 އިންސައްތައިގައެވެ. އެސްޓްރާޒެނެކާ ވެކްސިން ޖަހާ މީހުން މަރުވާ ނިސްބަތް އުޅެނީ 0.03 އިންސައްތައިގައެވެ.
