ޗައިނާއިން އެކުލަވާލާފައިވާ ޑޭޓާ ސެކިއުރިޓިއާ ބެހޭ ގާނޫނަށް އަމަލުކުރަން ފެށުމުގެ ކުރިން ޗައިނާއިން ވަނީ ސަރުކާރުގެ ކްލައުޑް ވިއުގައަށް އަމިއްލަ ކުންފުނިތަކުގެ ޑޭޓާ ހިޖުރަކުރުމަށް އަންގާފައެވެ. ޗައިނާގެ އަމިއްލަ ކުންފުނިތައް ކަމަށްވާ އަލީބާބާއާއި ޓެންސެންޓުން ދަނީ، ޑޭޓާ ހޯސްޓް ކުރުމުގެ ޚިދުމަތް ދެމުންނެވެ.
ޗައިނާގެ ޕާލަމެންޓުން ހުކުރު ދުވަހު ފާސްކޮށްފައިވާ ގާނޫނަށް އަމަލު ކުރަން ފަށާނީ 1 ނޮވެމްބަރުގައެވެ. މި ގާނޫނަކީ، ޗައިނާގައި ސައިބާސްޕޭސް ހަރުކަށި ގަވާއިދެއްގެ ތެރޭން ހިންގުމަށް އެކުލަވާލާފައިވާ ގާނޫނެކެވެ.
މި ގާނޫނު ބުނާ ގޮތުން މީހުންގެ ޒާތީ ޑޭޓާ ބަހަލައްޓަން ޖެހޭނީ ވަރަށް ރައްކާތެރި ގޮތަކަށެވެ. މީހުންގެ ޒާތީ މަޢުލޫމާތަށް އެއްވެސް ފަރާތަކަށް އަރައި ނުގަނެވޭ ގޮތަށް މަޢްލޫމާތު ރައްކާކުރަން ޖެހެއެވެ. އަދި ޒާތީ މަޢުލޫމާތު ރައްކާ ކުރަން ޖެހޭ ސާފު ސަބަބެއް ވެސް އޮންނަން ވާނެ ކަމަށް ގާނޫނުގައި ބުނެފައި ވެއެވެ.
